Ss. Angelorum Custodum
Ad Tertiam
- V.
- Deus ✠ in adiutórium meum inténde.
- R.
- Dómine, ad adiuvándum me festína.
Glória Patri, et Fílio, * et Spirítui Sancto.
Sicut erat in princípio, et nunc, et semper, * et in sǽcula sæculórum. Amen.
Allelúia.
Nunc, Sancte, nobis, Spíritus,
Unum Patri cum Fílio,
Dignáre promptus íngeri
Nostro refúsus péctori.
Os, lingua, mens, sensus, vigor
Confessiónem pérsonent.
Flamméscat igne cáritas,
Accéndat ardor próximos.
Præsta, Pater piíssime,
Patríque compar Únice,
Cum Spíritu Paráclito
Regnans per omne sǽculum.
Amen.
Psalmus 79(2-8) [1]
- 79:2 Qui regis Israël, inténde: * qui dedúcis velut ovem Ioseph.
- Qui sedes super Chérubim, * manifestáre coram Éphraim, Béniamin, et Manásse.
- 79:3 Éxcita poténtiam tuam, et veni, * ut salvos fácias nos.
- 79:4 Deus, convérte nos: * et osténde fáciem tuam, et salvi érimus.
- 79:5 Dómine, Deus virtútum, * quoúsque irascéris super oratiónem servi tui?
- 79:6 Cibábis nos pane lacrimárum: * et potum dabis nobis in lácrimis in mensúra?
- 79:7 Posuísti nos in contradictiónem vicínis nostris: * et inimíci nostri subsannavérunt nos.
- 79:8 Deus virtútum, convérte nos: * et osténde fáciem tuam, et salvi érimus.
Psalmus 79(9-20) [2]
- 79:9 Víneam de Ægýpto transtulísti: * eiecísti gentes, et plantásti eam.
- 79:10 Dux itíneris fuísti in conspéctu eius: * plantásti radíces eius, et implévit terram.
- 79:11 Opéruit montes umbra eius: * et arbústa eius cedros Dei.
- 79:12 Exténdit pálmites suos usque ad mare: * et usque ad flumen propágines eius.
- 79:13 Ut quid destruxísti macériam eius: * et vindémiant eam omnes, qui prætergrediúntur viam?
- 79:14 Exterminávit eam aper de silva: * et singuláris ferus depástus est eam.
- 79:15 Deus virtútum, convértere: * réspice de cælo, et vide, et vísita víneam istam.
- 79:16 Et pérfice eam, quam plantávit déxtera tua: * et super fílium hóminis, quem confirmásti tibi.
- 79:17 Incénsa igni, et suffóssa * ab increpatióne vultus tui períbunt.
- 79:18 Fiat manus tua super virum déxteræ tuæ: * et super fílium hóminis, quem confirmásti tibi.
- 79:19 Et non discédimus a te, vivificábis nos: * et nomen tuum invocábimus.
- 79:20 Dómine, Deus virtútum, convérte nos: * et osténde fáciem tuam, et salvi érimus.
Psalmus 81 [3]
- 81:1 Deus stetit in synagóga deórum: * in médio autem deos diiúdicat.
- 81:2 Úsquequo iudicátis iniquitátem: * et fácies peccatórum súmitis?
- 81:3 Iudicáte egéno, et pupíllo: * húmilem, et páuperem iustificáte.
- 81:4 Erípite páuperem: * et egénum de manu peccatóris liberáte.
- 81:5 Nesciérunt, neque intellexérunt, in ténebris ámbulant: * movebúntur ómnia fundaménta terræ.
- 81:6 Ego dixi: Dii estis, * et fílii Excélsi omnes.
- 81:7 Vos autem sicut hómines moriémini: * et sicut unus de princípibus cadétis.
- 81:8 Surge, Deus, iúdica terram: * quóniam tu hereditábis in ómnibus géntibus.
Exod. 23:20-21
Ecce ego mittam Angelum meum, qui præcédat te, et custódiat in via, et introdúcat in locum, quem parávi. Obsérva eum et audi vocem eius.
R. Deo grátias.
R. Stetit Angelus * Iuxta aram templi.
R. Stetit Angelus * Iuxta aram templi.
V. Habens thuríbulum áureum in manu sua.
R. Iuxta aram templi.
V. Glória Patri, et Fílio, * et Spirítui Sancto.
R. Stetit Angelus * Iuxta aram templi.
V. Ascéndit fumus arómatum in conspéctu Dómini.
R. De manu Angeli.
- V.
- Dómine, exáudi oratiónem meam.
- R.
- Et clamor meus ad te véniat.
Orémus.
Deus, qui ineffábili providéntia sanctos Angelos tuos ad nostram custódiam míttere dignáris: largíre supplícibus tuis; et eórum semper protectióne deféndi, et ætérna societáte gaudére.
Per Dóminum nostrum Iesum Christum, Fílium tuum: qui tecum vivit et regnat in unitáte Spíritus Sancti, Deus, per ómnia sǽcula sæculórum.
R. Amen.
- V.
- Dómine, exáudi oratiónem meam.
- R.
- Et clamor meus ad te véniat.
- V.
- Benedicámus Dómino.
- R.
- Deo grátias.
- V.
- Fidélium ánimæ per misericórdiam Dei requiéscant in pace.
- R.
- Amen.