B
In Dedicatione S. Michaëlis Archangelis I. classis
Feria III, 29 Septembris MMXXVI
Hodie Ad Missam →
1962 Pre-1955

In Dedicatione S. Michaëlis Archangelis

I. classis
Ad Prima

Ad Primam

V.
Deus ✠ in adiutórium meum inténde.
R.
Dómine, ad adiuvándum me festína.

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Allelúia.

Hymnus

Iam lucis orto sídere,

Deum precémur súpplices,

Ut in diúrnis áctibus

Nos servet a nocéntibus.

Linguam refrénans témperet,

Ne litis horror ínsonet:

Visum fovéndo cóntegat,

Ne vanitátes háuriat.

Sint pura cordis íntima,

Absístat et vecórdia;

Carnis terat supérbiam

Potus cibíque párcitas.

Ut, cum dies abscésserit,

Noctémque sors redúxerit,

Mundi per abstinéntiam

Ipsi canámus glóriam.

Deo Patri sit glória,

Eiúsque soli Fílio,

Cum Spíritu Paráclito,

Nunc et per omne sǽculum.

Amen.

Ant. Stetit Angelus * iuxta aram templi, habens thuríbulum áureum in manu sua.

Psalmus 53 [1]

  1. 53:3 Deus, in nómine tuo salvum me fac: * et in virtúte tua iúdica me.
  2. 53:4 Deus, exáudi oratiónem meam: * áuribus pércipe verba oris mei.
  3. 53:5 Quóniam aliéni insurrexérunt advérsum me, et fortes quæsiérunt ánimam meam: * et non proposuérunt Deum ante conspéctum suum.
  4. 53:6 Ecce enim, Deus ádiuvat me: * et Dóminus suscéptor est ánimæ meæ.
  5. 53:7 Avérte mala inimícis meis: * et in veritáte tua dispérde illos.
  6. 53:8 Voluntárie sacrificábo tibi, * et confitébor nómini tuo, Dómine: quóniam bonum est:
  7. 53:9 Quóniam ex omni tribulatióne eripuísti me: * et super inimícos meos despéxit óculus meus.

Psalmus 118(1-16) [2]

  1. 118:1 (Aleph) Beáti immaculáti in via: * qui ámbulant in lege Dómini.
  2. 118:2 Beáti, qui scrutántur testimónia eius: * in toto corde exquírunt eum.
  3. 118:3 Non enim qui operántur iniquitátem, * in viis eius ambulavérunt.
  4. 118:4 Tu mandásti * mandáta tua custodíri nimis.
  5. 118:5 Útinam dirigántur viæ meæ, * ad custodiéndas iustificatiónes tuas!
  6. 118:6 Tunc non confúndar, * cum perspéxero in ómnibus mandátis tuis.
  7. 118:7 Confitébor tibi in directióne cordis: * in eo quod dídici iudícia iustítiæ tuæ.
  8. 118:8 Iustificatiónes tuas custódiam: * non me derelínquas usquequáque.
  9. 118:9 (Beth) In quo córrigit adolescéntior viam suam? * In custodiéndo sermónes tuos.
  10. 118:10 In toto corde meo exquisívi te: * ne repéllas me a mandátis tuis.
  11. 118:11 In corde meo abscóndi elóquia tua: * ut non peccem tibi.
  12. 118:12 Benedíctus es, Dómine: * doce me iustificatiónes tuas.
  13. 118:13 In lábiis meis, * pronuntiávi ómnia iudícia oris tui.
  14. 118:14 In via testimoniórum tuórum delectátus sum, * sicut in ómnibus divítiis.
  15. 118:15 In mandátis tuis exercébor: * et considerábo vias tuas.
  16. 118:16 In iustificatiónibus tuis meditábor: * non oblivíscar sermónes tuos.

Psalmus 118(17-32) [3]

  1. 118:17 (Ghimel) Retríbue servo tuo, vivífica me: * et custódiam sermónes tuos:
  2. 118:18 Revéla óculos meos: * et considerábo mirabília de lege tua.
  3. 118:19 Íncola ego sum in terra: * non abscóndas a me mandáta tua.
  4. 118:20 Concupívit ánima mea desideráre iustificatiónes tuas, * in omni témpore.
  5. 118:21 Increpásti supérbos: * maledícti qui declínant a mandátis tuis.
  6. 118:22 Aufer a me oppróbrium, et contémptum: * quia testimónia tua exquisívi.
  7. 118:23 Étenim sedérunt príncipes, et advérsum me loquebántur: * servus autem tuus exercebátur in iustificatiónibus tuis.
  8. 118:24 Nam et testimónia tua meditátio mea est: * et consílium meum iustificatiónes tuæ.
  9. 118:25 (Daleth) Adhǽsit paviménto ánima mea: * vivífica me secúndum verbum tuum.
  10. 118:26 Vias meas enuntiávi, et exaudísti me: * doce me iustificatiónes tuas.
  11. 118:27 Viam iustificatiónum tuárum ínstrue me: * et exercébor in mirabílibus tuis.
  12. 118:28 Dormitávit ánima mea præ tǽdio: * confírma me in verbis tuis.
  13. 118:29 Viam iniquitátis ámove a me: * et de lege tua miserére mei.
  14. 118:30 Viam veritátis elégi: * iudícia tua non sum oblítus.
  15. 118:31 Adhǽsi testimóniis tuis, Dómine: * noli me confúndere.
  16. 118:32 Viam mandatórum tuórum cucúrri, * cum dilatásti cor meum.

1 Tim. 1:17

Regi sæculórum immortáli et invisíbili, soli Deo honor et glória in sǽcula sæculórum. Amen.

R. Deo grátias.

R. Christe, Fili Dei vivi, * Miserére nobis.

R. Christe, Fili Dei vivi, * Miserére nobis.

V. Qui sedes ad déxteram Patris.

R. Miserére nobis.

V. Glória Patri, et Fílio, * et Spirítui Sancto.

R. Christe, Fili Dei vivi, * Miserére nobis.

V. Exsúrge, Christe, ádiuva nos.

R. Et líbera nos propter nomen tuum.

V.
Dómine, exáudi oratiónem meam.
R.
Et clamor meus ad te véniat.

Orémus.

Dómine Deus omnípotens, qui ad princípium huius diéi nos perveníre fecísti: tua nos hódie salva virtúte; ut in hac die ad nullum declinémus peccátum, sed semper ad tuam iustítiam faciéndam nostra procédant elóquia, dirigántur cogitatiónes et ópera.

Per Dóminum nostrum Iesum Christum, Fílium tuum: qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

V. Dómine, exáudi oratiónem meam.

R. Et clamor meus ad te véniat.

V. Benedicámus Dómino.

R. Deo grátias.

Prídie Kaléndas Octóbris Luna duodevicésima Anno Dómini 2026

In Béthlehem Iudæ deposítio sancti Hierónymi Presbýteri, Confessóris et Ecclésiæ Doctóris, qui, ómnium stúdia litterárum adéptus ac probatórum Monachórum imitátor factus, multa hǽresum monstra gládio suæ doctrínæ confódit; demum, cum ad decrépitam usque vixísset ætátem, in pace quiévit, sepultúsque est ad Præsépe Dómini. Eius corpus, póstea Romam delátum, in Basílica sanctæ Maríæ Maióris cónditum fuit.

Romæ natális sancti Francísci Bórgiæ, Sacerdótis et Confessóris; qui Præpósitus Generális fuit Societátis Iesu, ac vitæ asperitáte, oratiónis dono, abdicátis sǽculi et recusátis Ecclésiæ dignitátibus, vir memorábilis éxstitit. Ipsíus autem festum sexto Idus Octóbris celebrátur.

Lexóvii, in Gállia, item natális sanctæ Terésiæ a Iesu Infánte, ex Ordine Carmelitárum Excalceatórum; quam, vitæ innocéntia et simplicitáte claríssimam, Pius Undécimus, Póntifex Máximus, sanctárum Vírginum albo adscrípsit, peculiárem ómnium Missiónum Patrónam declarávit, eiúsque festum quinto Nonas Octóbris recoléndum esse decrévit.

Romæ sancti Leopárdi Mártyris, qui ex Iuliáni Apóstatæ domésticis fuit; cui caput amputátum est, et corpus eius Aquisgránum póstea translátum.

Solodóri, in Gállia, pássio sanctórum Mártyrum Victóris et Ursi, ex gloriósa legióne Thebæórum, qui, sub Maximiáno Imperatóre, primum diris supplíciis cruciáti, sed, cælésti super eos lúmine coruscánte, ruéntibus in terram minístris, erépti; deínde in ignem missi, sed in nullo pénitus læsi; novíssime gládio consummáti sunt.

Placéntiæ sancti Antoníni Mártyris, ex eádem legióne.

Eódem die sancti Gregórii, Epíscopi magnæ Arméniæ, qui, sub Diocletiáno, multa passus est; ac tandem, Constantíni Magni Imperatóris témpore, in pace quiévit.

Cantuáriæ, in Anglia, sancti Honórii, Epíscopi et Confessóris.

Romæ sanctæ Sophíæ Víduæ, matris sanctárum Vírginum et Mártyrum Fídei, Spei et Caritátis.

V. Et álibi aliórum plurimórum sanctórum Mártyrum et Confessórum, atque sanctárum Vírginum.

R. Deo grátias.

V.
Pretiósa in conspéctu Dómini.
R.
Mors Sanctórum eius.

Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum.

R. Amen.

V.
Deus in adiutórium meum inténde.
R.
Dómine, ad adiuvándum me festína.
V.
Deus in adiutórium meum inténde.
R.
Dómine, ad adiuvándum me festína.
V.
Deus in adiutórium meum inténde.
R.
Dómine, ad adiuvándum me festína.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in sǽcula sæculórum. Amen.

Kýrie, eléison. Christe, eléison. Kýrie, eléison.

Pater Noster dicitur secreto usque ad Et ne nos indúcas in tentatiónem:

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum cotidiánum da nobis hódie: et dimítte nobis débita nostra, sicut et nos dimíttimus debitóribus nostris:

V. Et ne nos indúcas in tentatiónem:

R. Sed líbera nos a malo.

V. Réspice in servos tuos, Dómine, et in ópera tua, et dírige fílios eórum.

R. Et sit splendor Dómini Dei nostri super nos, et ópera mánuum nostrárum dírige super nos, et opus mánuum nostrárum dírige.

V. Glória Patri, et Fílio, * et Spirítui Sancto.

R. Sicut erat in princípio, et nunc, et semper, * et in sǽcula sæculórum. Amen.

Orémus.

Dirígere et sanctificáre, régere et gubernáre dignáre, Dómine Deus, Rex cæli et terræ, hódie corda et córpora nostra, sensus, sermónes et actus nostros in lege tua, et in opéribus mandatórum tuórum: ut hic et in ætérnum, te auxiliánte, salvi et líberi esse mereámur, Salvátor mundi: Qui vivis et regnas in sǽcula sæculórum.

R. Amen.

V.
Iube, Dómine, benedícere.

Benedictio.

Dies et actus nostros in sua pace dispónat Dóminus omnípotens.

R. Amen.

2 Thess 3:5

Dóminus autem dírigat corda et córpora nostra in caritáte Dei et patiéntia Christi.

V. Tu autem, Dómine, miserére nobis.

R. Deo grátias.

V.
Adiutórium nostrum ✠ in nómine Dómini.
R.
Qui fecit cælum et terram.
V.
Benedícite.
R.
Deus.

Benedictio.

Dóminus nos benedícat, ✠ et ab omni malo deféndat, et ad vitam perdúcat ætérnam. Et fidélium ánimæ per misericórdiam Dei requiéscant in pace.

R. Amen.