B
S. Birgittæ Viduæ
Feria IV, 7 Octobris MMXXVI
Hodie Ad Missam →
Pre-1955 1962

S. Birgittæ Viduæ

Ad Vesperae

Ante Divinum officium

secreto

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Ave María, grátia plena; Dóminus tecum: benedícta tu in muliéribus, et benedíctus fructus ventris tui Jesus. Sancta María, Mater Dei, ora pro nobis peccatóribus, nunc et in hora mortis nostræ. Amen.

Deinde, clara voce, dicitur Versus:

V. Deus ✠ in adjutórium meum inténde.

R. Dómine, ad adjuvándum me festína.

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Allelúja.

Ant. Quæ est ista, * speciósa sicut colúmba, quasi rosa plantáta super rivos aquárum?

Psalmus 109 [1]

  1. 109:1 Dixit Dóminus Dómino meo: * Sede a dextris meis:
  2. Donec ponam inimícos tuos, * scabéllum pedum tuórum.
  3. 109:2 Virgam virtútis tuæ emíttet Dóminus ex Sion: * domináre in médio inimicórum tuórum.
  4. 109:3 Tecum princípium in die virtútis tuæ in splendóribus sanctórum: * ex útero ante lucíferum génui te.
  5. 109:4 Jurávit Dóminus, et non pœnitébit eum: * Tu es sacérdos in ætérnum secúndum órdinem Melchísedech.
  6. 109:5 Dóminus a dextris tuis, * confrégit in die iræ suæ reges.
  7. 109:6 Judicábit in natiónibus, implébit ruínas: * conquassábit cápita in terra multórum.
  8. 109:7 De torrénte in via bibet: * proptérea exaltábit caput.
Ant. Virgo potens, * sicut turris David: mille clípei pendent ex ea, omnis armatúra fórtium.

Psalmus 112 [2]

  1. 112:1 Laudáte, púeri, Dóminum: * laudáte nomen Dómini.
  2. 112:2 (fit reverentia) Sit nomen Dómini benedíctum, * ex hoc nunc, et usque in sǽculum.
  3. 112:3 A solis ortu usque ad occásum, * laudábile nomen Dómini.
  4. 112:4 Excélsus super omnes gentes Dóminus, * et super cælos glória ejus.
  5. 112:5 Quis sicut Dóminus, Deus noster, qui in altis hábitat, * et humília réspicit in cælo et in terra?
  6. 112:7 Súscitans a terra ínopem, * et de stércore érigens páuperem:
  7. 112:8 Ut cóllocet eum cum princípibus, * cum princípibus pópuli sui.
  8. 112:9 Qui habitáre facit stérilem in domo, * matrem filiórum lætántem.
Ant. Ave, María, * grátia plena; Dóminus tecum: benedícta tu in muliéribus.

Psalmus 121 [3]

  1. 121:1 Lætátus sum in his, quæ dicta sunt mihi: * In domum Dómini íbimus.
  2. 121:2 Stantes erant pedes nostri, * in átriis tuis, Jerúsalem.
  3. 121:3 Jerúsalem, quæ ædificátur ut cívitas: * cujus participátio ejus in idípsum.
  4. 121:4 Illuc enim ascendérunt tribus, tribus Dómini: * testimónium Israël ad confiténdum nómini Dómini.
  5. 121:5 Quia illic sedérunt sedes in judício, * sedes super domum David.
  6. 121:6 Rogáte quæ ad pacem sunt Jerúsalem: * et abundántia diligéntibus te:
  7. 121:7 Fiat pax in virtúte tua: * et abundántia in túrribus tuis.
  8. 121:8 Propter fratres meos, et próximos meos, * loquébar pacem de te:
  9. 121:9 Propter domum Dómini, Dei nostri, * quæsívi bona tibi.
Ant. Benedíxit te Dóminus * in virtúte sua, quia per te ad níhilum redégit inimícos nostros.

Psalmus 126 [4]

  1. 126:1 Nisi Dóminus ædificáverit domum, * in vanum laboravérunt qui ædíficant eam.
  2. Nisi Dóminus custodíerit civitátem, * frustra vígilat qui custódit eam.
  3. 126:2 Vanum est vobis ante lucem súrgere: * súrgite postquam sedéritis, qui manducátis panem dolóris.
  4. Cum déderit diléctis suis somnum: * ecce heréditas Dómini fílii: merces, fructus ventris.
  5. 126:4 Sicut sagíttæ in manu poténtis: * ita fílii excussórum.
  6. 126:5 Beátus vir, qui implévit desidérium suum ex ipsis: * non confundétur cum loquétur inimícis suis in porta.
Ant. Vidérunt eam * fíliæ Sion vernántem in flóribus rosárum, et beatíssimam prædicavérunt.

Psalmus 147 [5]

  1. 147:1 Lauda, Jerúsalem, Dóminum: * lauda Deum tuum, Sion.
  2. 147:2 Quóniam confortávit seras portárum tuárum: * benedíxit fíliis tuis in te.
  3. 147:3 Qui pósuit fines tuos pacem: * et ádipe fruménti sátiat te.
  4. 147:4 Qui emíttit elóquium suum terræ: * velóciter currit sermo ejus.
  5. 147:5 Qui dat nivem sicut lanam: * nébulam sicut cínerem spargit.
  6. 147:6 Mittit crystállum suam sicut buccéllas: * ante fáciem frígoris ejus quis sustinébit?
  7. 147:7 Emíttet verbum suum, et liquefáciet ea: * flabit spíritus ejus, et fluent aquæ.
  8. 147:8 Qui annúntiat verbum suum Jacob: * justítias, et judícia sua Israël.
  9. 147:9 Non fecit táliter omni natióni: * et judícia sua non manifestávit eis.

Sir 24:25; 39:17

In me grátia omnis viæ et veritátis, in me omnis spes vitæ et virtútis. Ego, quasi rosa plantáta super rivos aquárum, fructificávi.

R. Deo grátias.

Capitulum Hymnus Versus

Te gestiéntem gáudiis,

Te sáuciam dolóribus,

Te jugi amíctam glória,

O Virgo Mater, pángimus.

Ave, redúndans gáudio

Dum cóncipis, dum vísitas;

Et edis, offers, ínvenis,

Mater beáta, Fílium.

Ave, dolens, et íntimo

In corde agónem, vérbera,

Spinas crucémque Fílii

Perpéssa, princeps mártyrum.

Ave, in triúmphis Fílii,

In ígnibus Parácliti,

In regni honóre et lúmine,

Regína fulgens glória.

Veníte, gentes, cárpite

Ex his rosas mystériis,

Et pulchri amóris ínclitæ

Matri corónas néctite.

Jesu, tibi sit glória,

Qui natus es de Vírgine,

Cum Patre et almo Spíritu,

In sempitérna sǽcula.

Amen.

V.
Regína sacratíssimi Rosárii, ora pro nobis.
R.
Ut digni efficiámur promissiónibus Christi.
Ant. Beáta Mater * et intácta Virgo, gloriósa Regína mundi, séntiant omnes tuum juvámen, quicúmque célebrant tuam sacratíssimi Rosárii solemnitátem.

Canticum B. Mariæ Virginis

  1. 1:46 Magníficat ✠ * ánima mea Dóminum.
  2. 1:47 Et exsultávit spíritus meus: * in Deo, salutári meo.
  3. 1:48 Quia respéxit humilitátem ancíllæ suæ: * ecce enim ex hoc beátam me dicent omnes generatiónes.
  4. 1:49 Quia fecit mihi magna qui potens est: * et sanctum nomen ejus.
  5. 1:50 Et misericórdia ejus, a progénie in progénies: * timéntibus eum.
  6. 1:51 Fecit poténtiam in brácchio suo: * dispérsit supérbos mente cordis sui.
  7. 1:52 Depósuit poténtes de sede: * et exaltávit húmiles.
  8. 1:53 Esuriéntes implévit bonis: * et dívites dimísit inánes.
  9. 1:54 Suscépit Israël púerum suum: * recordátus misericórdiæ suæ.
  10. 1:55 Sicut locútus est ad patres nostros: * Ábraham, et sémini ejus in sǽcula.
Preces Feriales{omittitur}
V.
Dómine, exáudi oratiónem meam.
R.
Et clamor meus ad te véniat.

Orémus.

Deus, cujus Unigénitus per vitam, mortem et resurrectiónem suam nobis salútis ætérnæ prǽmia comparávit: concéde, quǽsumus; ut hæc mystéria sacratíssimo beátæ Maríæ Vírginis Rosário recoléntes, et imitémur quod cóntinent, et quod promíttunt, assequámur.

Per eúmdem Dóminum nostrum Jesum Christum Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

Commemoratio S. Birgittæ Viduæ

Ant. Símile est regnum cælórum hómini negotiatóri quærénti bonas margarítas: invénta una pretiósa, dedit ómnia sua, et comparávit eam.
V.
Spécie tua et pulchritúdine tua.
R.
Inténde, próspere procéde, et regna.

Orémus.

Dómine, Deus noster, qui beátæ Birgíttæ per Fílium tuum unigénitum secréta cæléstia revelásti: ipsíus pia intercessióne da nobis fámulis tuis; in revelatióne sempitérnæ glóriæ tuæ gaudére lætántes.

Per eúmdem Dóminum nostrum Jesum Christum Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

Suffragium{omittitur}
V.
Dómine, exáudi oratiónem meam.
R.
Et clamor meus ad te véniat.
V.
Benedicámus Dómino.
R.
Deo grátias.
V.
Fidélium ánimæ per misericórdiam Dei requiéscant in pace.
R.
Amen.
Et si tunc terminetur Officium, dicitur tantum Pater Noster secreto.

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Post Divinum officium