B
Pretiosissimi Sanguinis Domini Nostri Jesu Christi Duplex I. classis
Feria IV, 1 Iulii MMXXVI
Hodie Ad Missam →
Pre-1955 1962

Pretiosissimi Sanguinis Domini Nostri Jesu Christi

Duplex I. classis
Ad Vesperae

Ante Divinum officium

secreto

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Ave María, grátia plena; Dóminus tecum: benedícta tu in muliéribus, et benedíctus fructus ventris tui Jesus. Sancta María, Mater Dei, ora pro nobis peccatóribus, nunc et in hora mortis nostræ. Amen.

Deinde, clara voce, dicitur Versus:

V. Deus ✠ in adjutórium meum inténde.

R. Dómine, ad adjuvándum me festína.

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Allelúja.

Ant. Quis est iste * qui venit de Edom tinctis véstibus de Bosra? iste formósus in stola sua.

Psalmus 109 [1]

  1. 109:1 Dixit Dóminus Dómino meo: * Sede a dextris meis:
  2. Donec ponam inimícos tuos, * scabéllum pedum tuórum.
  3. 109:2 Virgam virtútis tuæ emíttet Dóminus ex Sion: * domináre in médio inimicórum tuórum.
  4. 109:3 Tecum princípium in die virtútis tuæ in splendóribus sanctórum: * ex útero ante lucíferum génui te.
  5. 109:4 Jurávit Dóminus, et non pœnitébit eum: * Tu es sacérdos in ætérnum secúndum órdinem Melchísedech.
  6. 109:5 Dóminus a dextris tuis, * confrégit in die iræ suæ reges.
  7. 109:6 Judicábit in natiónibus, implébit ruínas: * conquassábit cápita in terra multórum.
  8. 109:7 De torrénte in via bibet: * proptérea exaltábit caput.
Ant. Ego * qui loquor justítiam et propugnátor sum ad salvándum.

Psalmus 110 [2]

  1. 110:1 Confitébor tibi, Dómine, in toto corde meo: * in consílio justórum, et congregatióne.
  2. 110:2 Magna ópera Dómini: * exquisíta in omnes voluntátes ejus.
  3. 110:3 Conféssio et magnificéntia opus ejus: * et justítia ejus manet in sǽculum sǽculi.
  4. 110:4 Memóriam fecit mirabílium suórum, miséricors et miserátor Dóminus: * escam dedit timéntibus se.
  5. 110:5 Memor erit in sǽculum testaménti sui: * virtútem óperum suórum annuntiábit pópulo suo:
  6. 110:7 Ut det illis hereditátem géntium: * ópera mánuum ejus véritas, et judícium.
  7. 110:8 Fidélia ómnia mandáta ejus: confirmáta in sǽculum sǽculi, * facta in veritáte et æquitáte.
  8. 110:9 Redemptiónem misit pópulo suo: * mandávit in ætérnum testaméntum suum.
  9. (fit reverentia) Sanctum, et terríbile nomen ejus: * inítium sapiéntiæ timor Dómini.
  10. 110:10 Intelléctus bonus ómnibus faciéntibus eum: * laudátio ejus manet in sǽculum sǽculi.
Ant. Vestítus erat * veste aspérsa sánguine, et vocátur nomen ejus Verbum Dei.

Psalmus 111 [3]

  1. 111:1 Beátus vir, qui timet Dóminum: * in mandátis ejus volet nimis.
  2. 111:2 Potens in terra erit semen ejus: * generátio rectórum benedicétur.
  3. 111:3 Glória, et divítiæ in domo ejus: * et justítia ejus manet in sǽculum sǽculi.
  4. 111:4 Exórtum est in ténebris lumen rectis: * miséricors, et miserátor, et justus.
  5. 111:5 Jucúndus homo qui miserétur et cómmodat, dispónet sermónes suos in judício: * quia in ætérnum non commovébitur.
  6. 111:7 In memória ætérna erit justus: * ab auditióne mala non timébit.
  7. Parátum cor ejus speráre in Dómino, confirmátum est cor ejus: * non commovébitur donec despíciat inimícos suos.
  8. 111:9 Dispérsit, dedit paupéribus: justítia ejus manet in sǽculum sǽculi, * cornu ejus exaltábitur in glória.
  9. 111:10 Peccátor vidébit, et irascétur, déntibus suis fremet et tabéscet: * desidérium peccatórum períbit.
Ant. Quare ergo * rubrum est induméntum tuum, et vestiménta tua sicut calcántium in torculári?

Psalmus 112 [4]

  1. 112:1 Laudáte, púeri, Dóminum: * laudáte nomen Dómini.
  2. 112:2 (fit reverentia) Sit nomen Dómini benedíctum, * ex hoc nunc, et usque in sǽculum.
  3. 112:3 A solis ortu usque ad occásum, * laudábile nomen Dómini.
  4. 112:4 Excélsus super omnes gentes Dóminus, * et super cælos glória ejus.
  5. 112:5 Quis sicut Dóminus, Deus noster, qui in altis hábitat, * et humília réspicit in cælo et in terra?
  6. 112:7 Súscitans a terra ínopem, * et de stércore érigens páuperem:
  7. 112:8 Ut cóllocet eum cum princípibus, * cum princípibus pópuli sui.
  8. 112:9 Qui habitáre facit stérilem in domo, * matrem filiórum lætántem.
Ant. Tórcular * calcávi solus, et de géntibus non est vir mecum.

Psalmus 147 [5]

  1. 147:1 Lauda, Jerúsalem, Dóminum: * lauda Deum tuum, Sion.
  2. 147:2 Quóniam confortávit seras portárum tuárum: * benedíxit fíliis tuis in te.
  3. 147:3 Qui pósuit fines tuos pacem: * et ádipe fruménti sátiat te.
  4. 147:4 Qui emíttit elóquium suum terræ: * velóciter currit sermo ejus.
  5. 147:5 Qui dat nivem sicut lanam: * nébulam sicut cínerem spargit.
  6. 147:6 Mittit crystállum suam sicut buccéllas: * ante fáciem frígoris ejus quis sustinébit?
  7. 147:7 Emíttet verbum suum, et liquefáciet ea: * flabit spíritus ejus, et fluent aquæ.
  8. 147:8 Qui annúntiat verbum suum Jacob: * justítias, et judícia sua Israël.
  9. 147:9 Non fecit táliter omni natióni: * et judícia sua non manifestávit eis.

Heb 9:11-12

Fratres: Christus assístens Póntifex futurórum bonórum, per ámplius et perféctius tabernáculum non manufáctum, id est, non hujus creatiónis: neque per sánguinem hircórum aut vitulórum, sed per próprium sánguinem introívit semel in Sancta, ætérna redemptióne invénta.

R. Deo grátias.

Capitulum Hymnus Versus

Festívis résonent cómpita vócibus,

Cives lætítiam fróntibus éxplicent,

Tædis flammíferis órdine pródeant

Instrúcti púeri et senes.

Quem dura móriens Christus in árbore

Fudit multíplici vúlnere sánguinem,

Nos facti mémores dum cólimus, decet

Saltem fúndere lácrimas.

Humáno géneri pernícies gravis

Adámi véteris crímine cóntigit:

Adámi intégritas et píetas novi

Vitam réddidit ómnibus.

Clamórem válidum summus ab ǽthere

Languéntibus Géniti si Pater áudiit,

Placári pótius sánguine débuit,

Et nobis véniam dare.

Hoc quicúmque stolam sánguine próluit,

Abstérgit máculas; et róseum decus,

Quo fiat símilis prótinus Angelis

Et Regi pláceat, capit.

Arecto instábilis trámite póstmodum

Se nullus rétrahat, meta sed última

Tangátur; tríbuet nóbile prǽmium,

Qui cursum Deus ádjuvat.

Nobis propítius sis, Génitor potens,

Ut, quos unígenæ sánguine Fílii

Emísti, et plácido Flámine récreas,

Cæli ad cúlmina tránsferas.

Amen.

V.
Te ergo quǽsumus, tuis fámulis súbveni.
R.
Quos pretióso sánguine redémisti.
Ant. Habébitis autem * hunc diem in monuméntum: et celebrábitis eum solémnem Dómino in generatiónibus vestris cultu sempitérno.

Canticum B. Mariæ Virginis

  1. 1:46 Magníficat ✠ * ánima mea Dóminum.
  2. 1:47 Et exsultávit spíritus meus: * in Deo, salutári meo.
  3. 1:48 Quia respéxit humilitátem ancíllæ suæ: * ecce enim ex hoc beátam me dicent omnes generatiónes.
  4. 1:49 Quia fecit mihi magna qui potens est: * et sanctum nomen ejus.
  5. 1:50 Et misericórdia ejus, a progénie in progénies: * timéntibus eum.
  6. 1:51 Fecit poténtiam in brácchio suo: * dispérsit supérbos mente cordis sui.
  7. 1:52 Depósuit poténtes de sede: * et exaltávit húmiles.
  8. 1:53 Esuriéntes implévit bonis: * et dívites dimísit inánes.
  9. 1:54 Suscépit Israël púerum suum: * recordátus misericórdiæ suæ.
  10. 1:55 Sicut locútus est ad patres nostros: * Ábraham, et sémini ejus in sǽcula.
Preces Feriales{omittitur}
V.
Dómine, exáudi oratiónem meam.
R.
Et clamor meus ad te véniat.

Orémus.

Omnípotens sempitérne Deus, qui unigénitum Fílium tuum mundi Redemptórem constituísti, ac ejus Sánguine placári voluísti: concéde, quǽsumus, salútis nostræ prétium solémni cultu ita venerári, atque a præséntis vitæ malis ejus virtúte deféndi in terris; ut fructu perpétuo lætémur in cælis.

Per eúmdem Dóminum nostrum Jesum Christum Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

Commemoratio In Visitatione Beatæ Mariæ Virginis

Ant. Beáta es, María, quæ credidísti: perficiéntur in te quæ dicta sunt tibi a Dómino, allelúja.
V.
Benedícta tu in muliéribus.
R.
Et benedíctus fructus ventris tui.

Orémus.

Fámulis tuis, quǽsumus, Dómine, cæléstis grátiæ munus impertíre: ut, quibus beátæ Vírginis partus éxstitit salútis exórdium; Visitatiónis ejus votíva solémnitas, pacis tríbuat increméntum.

Per Dóminum nostrum Jesum Christum, Fílium tuum: qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

Suffragium{omittitur}
V.
Dómine, exáudi oratiónem meam.
R.
Et clamor meus ad te véniat.
V.
Benedicámus Dómino.
R.
Deo grátias.
V.
Fidélium ánimæ per misericórdiam Dei requiéscant in pace.
R.
Amen.
Et si tunc terminetur Officium, dicitur tantum Pater Noster secreto.

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Post Divinum officium