S. Ephræm Syri Confessoris et Ecclesiæ Doctoris

Duplex

Ad Prima

Ad Primam

Ante Divinum officium

secreto

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Ave María, grátia plena; Dóminus tecum: benedícta tu in muliéribus, et benedíctus fructus ventris tui Jesus. Sancta María, Mater Dei, ora pro nobis peccatóribus, nunc et in hora mortis nostræ. Amen.

Credo in Deum, Patrem omnipoténtem, Creatórem cæli et terræ. Et in Jesum Christum, Fílium ejus únicum, Dóminum nostrum: qui concéptus est de Spíritu Sancto, natus ex María Vírgine, passus sub Póntio Piláto, crucifíxus, mórtuus, et sepúltus: descéndit ad ínferos; tértia die resurréxit a mórtuis; ascéndit ad cælos; sedet ad déxteram Dei Patris omnipoténtis: inde ventúrus est judicáre vivos et mórtuos. Credo in Spíritum Sanctum, sanctam Ecclésiam cathólicam, Sanctórum communiónem, remissiónem peccatórum, carnis resurrectiónem, vitam ætérnam. Amen.

Deinde, clara voce, dicitur Versus:

V. Deus ✠ in adjutórium meum inténde.

R. Dómine, ad adjuvándum me festína.

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Allelúja.

Hymnus

Jam lucis orto sídere,

Deum precémur súpplices,

Ut in diúrnis áctibus

Nos servet a nocéntibus.

Linguam refrénans témperet,

Ne litis horror ínsonet:

Visum fovéndo cóntegat,

Ne vanitátes háuriat.

Sint pura cordis íntima,

Absístat et vecórdia;

Carnis terat supérbiam

Potus cibíque párcitas.

Ut, cum dies abscésserit,

Noctémque sors redúxerit,

Mundi per abstinéntiam

Ipsi canámus glóriam.

Jesu, tibi sit glória,

Qui Corde fundis grátiam,

Cum Patre et almo Spíritu,

In sempitérna sǽcula.

Amen.

Ant. In loco páscuæ.

Psalmus 22 [1]

22:1 Dóminus regit me, et nihil mihi déerit: * in loco páscuæ ibi me collocávit.
22:2 Super aquam refectiónis educávit me: * ánimam meam convértit.
22:3 Dedúxit me super sémitas justítiæ, * propter nomen suum.
22:4 Nam, et si ambulávero in médio umbræ mortis, non timébo mala: * quóniam tu mecum es.
Virga tua, et báculus tuus: * ipsa me consoláta sunt.
22:5 Parásti in conspéctu meo mensam, * advérsus eos, qui tríbulant me.
Impinguásti in óleo caput meum: * et calix meus inébrians quam præclárus est!
22:6 Et misericórdia tua subsequétur me * ómnibus diébus vitæ meæ:
Et ut inhábitem in domo Dómini, * in longitúdinem diérum.

Psalmus 71(2-8) [2]

71:2 Deus, judícium tuum regi da: * et justítiam tuam fílio regis:
Judicáre pópulum tuum in justítia, * et páuperes tuos in judício.
71:3 Suscípiant montes pacem pópulo: * et colles justítiam.
71:4 Judicábit páuperes pópuli, et salvos fáciet fílios páuperum: * et humiliábit calumniatórem.
71:5 Et permanébit cum sole, et ante lunam, * in generatióne et generatiónem.
71:6 Descéndet sicut plúvia in vellus: * et sicut stillicídia stillántia super terram.
71:7 Oriétur in diébus ejus justítia, et abundántia pacis: * donec auferátur luna.
71:8 Et dominábitur a mari usque ad mare: * et a flúmine usque ad términos orbis terrárum.

Psalmus 71(9-19) [3]

71:9 Coram illo prócident Æthíopes: * et inimíci ejus terram lingent.
71:10 Reges Tharsis, et ínsulæ múnera ófferent: * reges Árabum et Saba dona addúcent.
71:11 Et adorábunt eum omnes reges terræ: * omnes gentes sérvient ei:
71:12 Quia liberábit páuperem a poténte: * et páuperem, cui non erat adjútor.
71:13 Parcet páuperi et ínopi: * et ánimas páuperum salvas fáciet.
71:14 Ex usúris et iniquitáte rédimet ánimas eórum: * et honorábile nomen eórum coram illo.
71:15 Et vivet, et dábitur ei de auro Arábiæ, et adorábunt de ipso semper: * tota die benedícent ei.
71:16 Et erit firmaméntum in terra in summis móntium, superextollétur super Líbanum fructus ejus: * et florébunt de civitáte sicut fænum terræ.
71:17 Sit nomen ejus benedíctum in sǽcula: * ante solem pérmanet nomen ejus.
Et benedicéntur in ipso omnes tribus terræ: * omnes gentes magnificábunt eum.
71:18 Benedíctus Dóminus, Deus Israël, * qui facit mirabília solus:
71:19 Et benedíctum nomen majestátis ejus in ætérnum: * et replébitur majestáte ejus omnis terra: fiat, fiat.

1 Tim. 1:17

Regi sæculórum immortáli et invisíbili, soli Deo honor et glória in sǽcula sæculórum. Amen.

R. Deo grátias.

R. Christe, Fili Dei vivi, * Miserére nobis.

V. Qui corde fundis grátiam.

R. Miserére nobis.

V. Glória Patri, et Fílio, * et Spirítui Sancto.

R. Christe, Fili Dei vivi, * Miserére nobis.

V. Exsúrge, Christe, ádjuva nos.

R. Et líbera nos propter nomen tuum.

Preces Dominicales et Feriales{omittitur}

Preces Feriales{omittitur}

Preces Dominicales et Feriales{omittitur}

V.: Dómine, exáudi oratiónem meam.
R.: Et clamor meus ad te véniat.

Orémus.

Dómine Deus omnípotens, qui ad princípium hujus diéi nos perveníre fecísti: tua nos hódie salva virtúte; ut in hac die ad nullum declinémus peccátum, sed semper ad tuam justítiam faciéndam nostra procédant elóquia, dirigántur cogitatiónes et ópera.

Per Dóminum nostrum Jesum Christum, Fílium tuum: qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

V. Dómine, exáudi oratiónem meam.

R. Et clamor meus ad te véniat.

V. Benedicámus Dómino.

R. Deo grátias.

Tertiodécimo Kaléndas Júlii Luna quarta Anno Dómini 2026

Octáva sacratíssimi Cordis Jesu.

Floréntiæ sanctæ Juliánæ Falconériæ Vírginis, quæ Sorórum Ordinis Servórum beátæ Maríæ Vírginis fuit Institútrix, et a Cleménte Duodécimo, Pontífice Máximo, in sanctárum Vírginum númerum reláta est.

Medioláni sanctórum Mártyrum Gervásii et Protásii fratrum, ex quibus priórem támdiu jussit Astásius Judex plumbátis cædi, quoúsque ille spíritum exhaláret; posteriórem vero, fústibus cæsum, cápite truncári. Horum córpora, Dómino revelánte, beátus Ambrósius sánguine conspérsa et ita incorrúpta réperit, ac si eo die ipsi fuíssent interémpti; in quorum translatióne cæcus, féretri tactu, lumen recépit, et plúrimi, vexáti a dæmónibus, liberáti sunt.

In monastério Vallis Castri, in Picéno, natális sancti Romuáldi Ravennátis, Anachorétæ et Monachórum Camaldulénsium Patris; qui collápsam in Itália eremíticam discíplinam restítuit ac mirífice propagávit. Ejus tamen festívitas recólitur séptimo Idus Februárii, quo die sacræ ipsíus relíquiæ Fabriánum sunt translátæ.

Arétii, in Túscia, sanctórum Mártyrum Gaudéntii Epíscopi, et Culmátii Diáconi, qui, témpore Valentiniáni, furóre Gentílium cæsi sunt.

Eódem die sancti Bonifátii, Epíscopi et Mártyris; qui fuit beáti Romuáldi discípulus. Hic, a Gregório Quinto, Románo Pontífice, ad prædicándum Evangélium in Rússiam missus, ibi, cum per ignem transísset illǽsus, Regémque ac pópulum baptizásset, a furénte Regis fratre necátus est, atque sic optátam martýrii corónam accépit.

Ravénnæ sancti Ursicíni Mártyris, qui, sub Paulíno Júdice, post plúrima torménta, in Dómini confessióne pérmanens immóbilis, cápitis abscissióne martýrium complévit.

Sozópoli, in Pisídia, sancti Zósimi Mártyris, qui, in persecutióne Trajáni, sub Domitiáno Prǽside, post acérbos cruciátus, cápite amputáto, victor migrávit ad Dóminum.

V. Et álibi aliórum plurimórum sanctórum Mártyrum et Confessórum, atque sanctárum Vírginum.

R. Deo grátias.

V.: Pretiósa in conspéctu Dómini.
R.: Mors Sanctórum ejus.

Sancta María et omnes Sancti intercédant pro nobis ad Dóminum, ut nos mereámur ab eo adjuvári et salvári, qui vivit et regnat in sǽcula sæculórum.

R. Amen.

V.: Deus in adjutórium meum inténde.
R.: Dómine, ad adjuvándum me festína.

V.: Deus in adjutórium meum inténde.
R.: Dómine, ad adjuvándum me festína.

V.: Deus in adjutórium meum inténde.
R.: Dómine, ad adjuvándum me festína.

V.: Glória Patri, et Fílio, * et Spirítui Sancto.
R.: Sicut erat in princípio, et nunc, et semper, * et in sǽcula sæculórum. Amen.

Kýrie, eléison. Christe, eléison. Kýrie, eléison.

Pater Noster dicitur secreto usque ad Et ne nos indúcas in tentatiónem:

V. Et ne nos indúcas in tentatiónem:

R. Sed líbera nos a malo.

V. Réspice in servos tuos, Dómine, et in ópera tua, et dírige fílios eórum.

R. Et sit splendor Dómini Dei nostri super nos, et ópera mánuum nostrárum dírige super nos, et opus mánuum nostrárum dírige.

V. Glória Patri, et Fílio, * et Spirítui Sancto.

R. Sicut erat in princípio, et nunc, et semper, * et in sǽcula sæculórum. Amen.

Orémus.

Dirígere et sanctificáre, régere et gubernáre dignáre, Dómine Deus, Rex cæli et terræ, hódie corda et córpora nostra, sensus, sermónes et actus nostros in lege tua, et in opéribus mandatórum tuórum: ut hic et in ætérnum, te auxiliánte, salvi et líberi esse mereámur, Salvátor mundi: Qui vivis et regnas in sǽcula sæculórum.

R. Amen.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.

V.: Jube, domne, benedícere.

Benedictio. Sap 10:10

Dies et actus nostros in sua pace dispónat Dóminus omnípotens.

R. Amen.

Justum dedúxit Dóminus per vias rectas, et osténdit illi regnum Dei, et dedit illi sciéntiam sanctórum: honestávit illum in labóribus, et complévit labóres illíus.

V. Tu autem, Dómine, miserére nobis.

R. Deo grátias.

V.: Adjutórium nostrum ✠ in nómine Dómini.
R.: Qui fecit cælum et terram.

V.: Benedícite.
R.: Deus.

Benedictio.

Dóminus nos benedícat, ✠ et ab omni malo deféndat, et ad vitam perdúcat ætérnam. Et fidélium ánimæ per misericórdiam Dei requiéscant in pace.

R. Amen.

Deinde dicitur tantum Pater Noster secreto, nisi sequatur alia Hora.

Post Divinum officium