B
Die VI infra Octavam SSmi Cordis Jesu Semiduplex III. ordinis
Feria IV, 17 Iunii MMXXVI
Hodie Ad Missam →
Pre-1955 1962

Die VI infra Octavam SSmi Cordis Jesu

Semiduplex III. ordinis
Ad Matutinum

Ante Divinum officium

secreto

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Ave María, grátia plena; Dóminus tecum: benedícta tu in muliéribus, et benedíctus fructus ventris tui Jesus. Sancta María, Mater Dei, ora pro nobis peccatóribus, nunc et in hora mortis nostræ. Amen.

Credo in Deum, Patrem omnipoténtem, Creatórem cæli et terræ. Et in Jesum Christum, Fílium ejus únicum, Dóminum nostrum: qui concéptus est de Spíritu Sancto, natus ex María Vírgine, passus sub Póntio Piláto, crucifíxus, mórtuus, et sepúltus: descéndit ad ínferos; tértia die resurréxit a mórtuis; ascéndit ad cælos; sedet ad déxteram Dei Patris omnipoténtis: inde ventúrus est judicáre vivos et mórtuos. Credo in Spíritum Sanctum, sanctam Ecclésiam cathólicam, Sanctórum communiónem, remissiónem peccatórum, carnis resurrectiónem, vitam ætérnam. Amen.

Deinde, clara voce, dicitur Versus:

V. Dómine, lábia + mea apéries.

R. Et os meum annuntiábit laudem tuam.

V. Deus ✠ in adjutórium meum inténde.

R. Dómine, ad adjuvándum me festína.

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Allelúja.

Invitatorium

Ant. Cor Jesu amóre nostri vulnerátum * Veníte, adorémus.

Veníte, exsultémus Dómino, jubilémus Deo, salutári nostro: præoccupémus fáciem ejus in confessióne, et in psalmis jubilémus ei.

Ant. Cor Jesu amóre nostri vulnerátum * Veníte, adorémus.

Quóniam Deus magnus Dóminus, et Rex magnus super omnes deos, quóniam non repéllet Dóminus plebem suam: quia in manu ejus sunt omnes fines terræ, et altitúdines móntium ipse cónspicit.

Ant. Veníte, adorémus.

Quóniam ipsíus est mare, et ipse fecit illud, et áridam fundavérunt manus ejus (genuflectitur) veníte, adorémus, et procidámus ante Deum: plorémus coram Dómino, qui fecit nos, quia ipse est Dóminus, Deus noster; nos autem pópulus ejus, et oves páscuæ ejus.

Ant. Cor Jesu amóre nostri vulnerátum * Veníte, adorémus.

Hódie, si vocem ejus audiéritis, nolíte obduráre corda vestra, sicut in exacerbatióne secúndum diem tentatiónis in desérto: ubi tentavérunt me patres vestri, probavérunt et vidérunt ópera mea.

Ant. Veníte, adorémus.

Quadragínta annis próximus fui generatióni huic, et dixi: Semper hi errant corde, ipsi vero non cognovérunt vias meas: quibus jurávi in ira mea: Si introíbunt in réquiem meam.

Ant. Cor Jesu amóre nostri vulnerátum * Veníte, adorémus.

V. Glória Patri, et Fílio, * et Spirítui Sancto.

R. Sicut erat in princípio, et nunc, et semper, * et in sǽcula sæculórum. Amen.

Ant. Veníte, adorémus.

Ant. Cor Jesu amóre nostri vulnerátum * Veníte, adorémus.

Hymnus

Auctor beáte sǽculi,

Christe, Redémptor ómnium,

Lumen Patris de lúmine,

Deúsque verus de Deo.

Amor coégit te tuus

Mortále corpus súmere,

Ut novus Adam rédderes,

Quod vetus ille abstúlerat.

Ille amor, almus ártifex

Terræ marísque, et síderum,

Erráta patrum míserans,

Et nostra rumpens víncula.

Non Corde discédat tuo

Vis illa amóris íncliti:

Hoc fonte gentes háuriant

Remissiónis grátiam.

Percússum ad hoc est láncea,

Passúmque ad hoc est vúlnera:

Ut nos laváret sórdibus,

Unda fluénte, et sánguine.

Jesu, tibi sit glória,

Qui Corde fundis grátiam,

Cum Patre, et almo Spíritu,

In sempitérna sǽcula.

Amen.

Nocturnus I

Ant. Cogitatiónes.

Psalmus 32 [1]

  1. 32:1 Exsultáte, justi, in Dómino: * rectos decet collaudátio.
  2. 32:2 Confitémini Dómino in cíthara: * in psaltério decem chordárum psállite illi.
  3. 32:3 Cantáte ei cánticum novum: * bene psállite ei in vociferatióne.
  4. 32:4 Quia rectum est verbum Dómini, * et ómnia ópera ejus in fide.
  5. 32:5 Díligit misericórdiam et judícium: * misericórdia Dómini plena est terra.
  6. 32:6 Verbo Dómini cæli firmáti sunt: * et spíritu oris ejus omnis virtus eórum.
  7. 32:7 Cóngregans sicut in utre aquas maris: * ponens in thesáuris abýssos.
  8. 32:8 Tímeat Dóminum omnis terra: * ab eo autem commoveántur omnes inhabitántes orbem.
  9. 32:9 Quóniam ipse dixit, et facta sunt: * ipse mandávit, et creáta sunt.
  10. 32:10 Dóminus díssipat consília géntium: * réprobat autem cogitatiónes populórum, et réprobat consília príncipum.
  11. 32:11 Consílium autem Dómini in ætérnum manet: * cogitatiónes cordis ejus in generatióne et generatiónem.
  12. 32:12 Beáta gens, cujus est Dóminus, Deus ejus: * pópulus, quem elégit in hereditátem sibi.
  13. 32:13 De cælo respéxit Dóminus: * vidit omnes fílios hóminum.
  14. 32:14 De præparáto habitáculo suo * respéxit super omnes, qui hábitant terram.
  15. 32:15 Qui finxit sigillátim corda eórum: * qui intéllegit ómnia ópera eórum.
  16. 32:16 Non salvátur rex per multam virtútem: * et gigas non salvábitur in multitúdine virtútis suæ.
  17. 32:17 Fallax equus ad salútem: * in abundántia autem virtútis suæ non salvábitur.
  18. 32:18 Ecce, óculi Dómini super metuéntes eum: * et in eis, qui sperant super misericórdia ejus:
  19. 32:19 Ut éruat a morte ánimas eórum: * et alat eos in fame.
  20. 32:20 Ánima nostra sústinet Dóminum: * quóniam adjútor et protéctor noster est.
  21. 32:21 Quia in eo lætábitur cor nostrum: * et in nómine sancto ejus sperávimus.
  22. 32:22 Fiat misericórdia tua, Dómine, super nos: * quemádmodum sperávimus in te.
Ant. Apud te.

Psalmus 35 [2]

  1. 35:2 Dixit injústus ut delínquat in semetípso: * non est timor Dei ante óculos ejus.
  2. 35:3 Quóniam dolóse egit in conspéctu ejus: * ut inveniátur iníquitas ejus ad ódium.
  3. 35:4 Verba oris ejus iníquitas, et dolus: * nóluit intellégere ut bene ágeret.
  4. 35:5 Iniquitátem meditátus est in cubíli suo: * ástitit omni viæ non bonæ, malítiam autem non odívit.
  5. 35:6 Dómine, in cælo misericórdia tua: * et véritas tua usque ad nubes.
  6. 35:7 Justítia tua sicut montes Dei: * judícia tua abýssus multa.
  7. Hómines, et juménta salvábis, Dómine: * quemádmodum multiplicásti misericórdiam tuam, Deus.
  8. 35:8 Fílii autem hóminum, * in tégmine alárum tuárum sperábunt.
  9. 35:9 Inebriabúntur ab ubertáte domus tuæ: * et torrénte voluptátis tuæ potábis eos.
  10. 35:10 Quóniam apud te est fons vitæ: * et in lúmine tuo vidébimus lumen.
  11. 35:11 Præténde misericórdiam tuam sciéntibus te, * et justítiam tuam his, qui recto sunt corde.
  12. 35:12 Non véniat mihi pes supérbiæ: * et manus peccatóris non móveat me.
  13. 35:13 Ibi cecidérunt qui operántur iniquitátem: * expúlsi sunt, nec potuérunt stare.
Ant. Homo.

Psalmus 40 [3]

  1. 40:2 Beátus qui intéllegit super egénum, et páuperem: * in die mala liberábit eum Dóminus.
  2. 40:3 Dóminus consérvet eum, et vivíficet eum, et beátum fáciat eum in terra: * et non tradat eum in ánimam inimicórum ejus.
  3. 40:4 Dóminus opem ferat illi super lectum dolóris ejus: * univérsum stratum ejus versásti in infirmitáte ejus.
  4. 40:5 Ego dixi: Dómine, miserére mei: * sana ánimam meam, quia peccávi tibi.
  5. 40:6 Inimíci mei dixérunt mala mihi: * Quando moriétur, et períbit nomen ejus?
  6. 40:7 Et si ingrediebátur ut vidéret, vana loquebátur: * cor ejus congregávit iniquitátem sibi.
  7. Egrediebátur foras, * et loquebátur in idípsum.
  8. 40:8 Advérsum me susurrábant omnes inimíci mei: * advérsum me cogitábant mala mihi.
  9. 40:9 Verbum iníquum constituérunt advérsum me: * Numquid qui dormit non adíciet ut resúrgat?
  10. 40:10 Étenim homo pacis meæ, in quo sperávi: * qui edébat panes meos, magnificávit super me supplantatiónem.
  11. 40:11 Tu autem, Dómine, miserére mei, et resúscita me: * et retríbuam eis.
  12. 40:12 In hoc cognóvi quóniam voluísti me: * quóniam non gaudébit inimícus meus super me.
  13. 40:13 Me autem propter innocéntiam suscepísti: * et confirmásti me in conspéctu tuo in ætérnum.
  14. 40:14 Benedíctus Dóminus, Deus Israël, a sǽculo et usque in sǽculum: * fiat, fiat.
V.
Tóllite jugum meum super vos et díscite a me.
R.
Quia mitis sum et húmilis Corde.
Pater Noster dicitur secreto usque ad Et ne nos indúcas in tentatiónem:

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris:

V. Et ne nos indúcas in tentatiónem:

R. Sed líbera nos a malo.

Absolutio.

Exáudi, Dómine Jesu Christe, preces servórum tuórum, et miserére nobis: Qui cum Patre et Spíritu Sancto vivis et regnas in sǽcula sæculórum.

R. Amen.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Benedictióne perpétua benedícat nos Pater ætérnus.

R. Amen.

De libro primo Regum

Fílius uníus anni erat Saul, cum regnáre cœpísset; duóbus autem annis regnávit super Israël.

Et elégit sibi Saul tria míllia de Israël. Et erant cum Saul duo míllia in Machmas et in monte Bethel, mille autem cum Jónatha in Gábaa Bénjamin. Porro céterum pópulum remísit unumquémque in tabernácula sua.

Et percússit Jónathas statiónem Philisthinórum, quæ erat in Gábaa. Quod cum audíssent Philísthiim Saul cécinit búccina in omni terra dicens: Audiant Hebrǽi.

Et univérsus Israël audívit hujuscémodi famam: Percússit Saul statiónem Philisthinórum, et eréxit se Israël advérsus Philísthiim; clamávit ergo pópulus post Saul in Gálgala.

1 Reg 13:1-4

V. Tu autem, Dómine, miserére nobis.

R. Deo grátias.

R. Fériam eis pactum sempitérnum et non désinam eis benefácere et timórem meum dabo in corde eórum

* Ut non recédant a me.

V. Et lætábor super eis cum bene eis fécero in toto Corde meo.

R. Ut non recédant a me.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Unigénitus Dei Fílius nos benedícere et adjuváre dignétur.

R. Amen.

Et Philísthiim congregáti sunt ad præliándum contra Israël, trigínta míllia cúrruum et sex míllia équitum et réliquum vulgus, sicut aréna, quæ est in líttore maris plúrima. Et ascendéntes castrametáti sunt in Machmas ad oriéntem Betháven.

Quod cum vidíssent viri Israël se in arcto pósitos, (afflíctus enim erat pópulus) abscondérunt se in spelúncis et in ábditis, in petris quoque et in antris et in cistérnis.

Hebrǽi autem transiérunt Jordánem in terram Gad et Gálaad. Cumque adhuc esset Saul in Gálgala, univérsus pópulus pertérritus est, qui sequebátur eum.

Et exspectávit septem diébus juxta plácitum Samuélis; et non venit Sámuel in Gálgala, dilapsúsque est pópulus ab eo.

1 Reg 13:5-8

V. Tu autem, Dómine, miserére nobis.

R. Deo grátias.

R. Si inimícus meus maledixísset mihi, sustinuíssem útique

* Tu vero homo unánimis qui simul mecum dulces capiébas cibos.

V. Et si is qui me óderat super me magna locútus fuísset, abscondíssem me fórsitan ab eo.

R. Tu vero homo unánimis qui simul mecum dulces capiébas cibos.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Spíritus Sancti grátia illúminet sensus et corda nostra.

R. Amen.

Ait ergo Saul: Afférte mihi holocáustum et pacífica. Et óbtulit holocáustum.

Cumque complésset ófferens holocáustum, ecce Samuel veniébat; et egréssus est Saul óbviam ei ut salutáret eum.

Locutúsque est ad eum Samuel: Quid fecísti? Respóndit Saul: Quia vidi quod pópulus dilaberétur a me, et tu non véneras juxta plácitos dies, porro Philísthiim congregáti fúerant in Machmas,

Dixi: Nunc descéndent Philísthiim ad me in Gálgala, et fáciem Dómini non placávi. Necessitáte compúlsus, óbtuli holocáustum.

Dixítque Sámuel ad Saul: Stulte egísti, nec custodísti mandáta Dómini Dei tui, quæ præcépit tibi. Quod si non fecísses, jam nunc præparásset Dóminus regnum tuum super Israël in sempitérnum;

Sed nequáquam regnum tuum ultra consúrget. Quæsívit Dóminus sibi virum juxta cor suum et præcépit ei Dóminus ut esset dux super pópulum suum, eo quod non serváveris quæ præcépit Dóminus.

1 Reg 13:9-14

V. Tu autem, Dómine, miserére nobis.

R. Deo grátias.

R. Cum essémus mórtui peccátis, convivificávit nos Deus in Christo

* Propter nímiam caritátem suam qua diléxit nos.

V. Ut osténderet in sǽculis superveniéntibus abundántes divítias grátiæ suæ.

R. Propter nímiam caritátem suam qua diléxit nos.

V. Glória Patri, et Fílio, * et Spirítui Sancto.

R. Propter nímiam caritátem suam qua diléxit nos.

Nocturnus II

Ant. Rex omnis terræ.

Psalmus 46 [4]

  1. 46:2 Omnes gentes, pláudite mánibus: * jubiláte Deo in voce exsultatiónis.
  2. 46:3 Quóniam Dóminus excélsus, terríbilis: * Rex magnus super omnem terram.
  3. 46:4 Subjécit pópulos nobis: * et gentes sub pédibus nostris.
  4. 46:5 Elégit nobis hereditátem suam: * spéciem Jacob, quam diléxit.
  5. 46:6 Ascéndit Deus in júbilo: * et Dóminus in voce tubæ.
  6. 46:7 Psállite Deo nostro, psállite: * psállite Regi nostro, psállite.
  7. 46:8 Quóniam Rex omnis terræ Deus: * psállite sapiénter.
  8. 46:9 Regnábit Deus super gentes: * Deus sedet super sedem sanctam suam.
  9. 46:10 Príncipes populórum congregáti sunt cum Deo Ábraham: * quóniam dii fortes terræ veheménter eleváti sunt.
Ant. Dum anxiarétur.

Psalmus 60 [5]

  1. 60:2 Exáudi, Deus, deprecatiónem meam: * inténde oratióni meæ.
  2. 60:3 A fínibus terræ ad te clamávi: * dum anxiarétur cor meum, in petra exaltásti me.
  3. 60:4 Deduxísti me, quia factus es spes mea: * turris fortitúdinis a fácie inimíci.
  4. 60:5 Inhabitábo in tabernáculo tuo in sǽcula: * prótegar in velaménto alárum tuárum.
  5. 60:6 Quóniam tu, Deus meus, exaudísti oratiónem meam: * dedísti hereditátem timéntibus nomen tuum.
  6. 60:7 Dies super dies regis adícies: * annos ejus usque in diem generatiónis et generatiónis.
  7. 60:8 Pérmanet in ætérnum in conspéctu Dei: * misericórdiam et veritátem ejus quis requíret?
  8. 60:9 Sic psalmum dicam nómini tuo in sǽculum sǽculi: * ut reddam vota mea de die in diem.
Ant. Secúndum multitúdinem.

Psalmus 93 [6]

  1. 93:1 Deus ultiónum Dóminus: * Deus ultiónum líbere egit.
  2. 93:2 Exaltáre, qui júdicas terram: * redde retributiónem supérbis.
  3. 93:3 Úsquequo peccatóres, Dómine, * úsquequo peccatóres gloriabúntur:
  4. 93:4 Effabúntur, et loquéntur iniquitátem: * loquéntur omnes, qui operántur injustítiam?
  5. 93:5 Pópulum tuum, Dómine, humiliavérunt: * et hereditátem tuam vexavérunt.
  6. 93:6 Víduam, et ádvenam interfecérunt: * et pupíllos occidérunt.
  7. 93:7 Et dixérunt: Non vidébit Dóminus, * nec intélleget Deus Jacob.
  8. 93:8 Intellégite, insipiéntes in pópulo: * et stulti, aliquándo sápite.
  9. 93:9 Qui plantávit aurem, non áudiet? * aut qui finxit óculum, non consíderat?
  10. 93:10 Qui córripit gentes, non árguet: * qui docet hóminem sciéntiam?
  11. 93:11 Dóminus scit cogitatiónes hóminum, * quóniam vanæ sunt.
  12. 93:12 Beátus homo, quem tu erudíeris, Dómine: * et de lege tua docúeris eum,
  13. 93:13 Ut mítiges ei a diébus malis: * donec fodiátur peccatóri fóvea.
  14. 93:14 Quia non repéllet Dóminus plebem suam: * et hereditátem suam non derelínquet.
  15. 93:15 Quoadúsque justítia convertátur in judícium: * et qui juxta illam omnes qui recto sunt corde.
  16. 93:16 Quis consúrget mihi advérsus malignántes? * aut quis stabit mecum advérsus operántes iniquitátem?
  17. 93:17 Nisi quia Dóminus adjúvit me: * paulo minus habitásset in inférno ánima mea.
  18. 93:18 Si dicébam: Motus est pes meus: * misericórdia tua, Dómine, adjuvábat me.
  19. 93:19 Secúndum multitúdinem dolórum meórum in corde meo: * consolatiónes tuæ lætificavérunt ánimam meam.
  20. 93:20 Numquid adhǽret tibi sedes iniquitátis: * qui fingis labórem in præcépto?
  21. 93:21 Captábunt in ánimam justi: * et sánguinem innocéntem condemnábunt.
  22. 93:22 Et factus est mihi Dóminus in refúgium: * et Deus meus in adjutórium spei meæ.
  23. 93:23 Et reddet illis iniquitátem ipsórum: et in malítia eórum dispérdet eos: * dispérdet illos Dóminus, Deus noster.
V.
Ego dixi, Dómine, miserére mei.
R.
Sana ánimam meam quia peccávi tibi.
Pater Noster dicitur secreto usque ad Et ne nos indúcas in tentatiónem:

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris:

V. Et ne nos indúcas in tentatiónem:

R. Sed líbera nos a malo.

Absolutio.

Ipsíus píetas et misericórdia nos ádjuvet, qui cum Patre et Spíritu Sancto vivit et regnat in sǽcula sæculórum.

R. Amen.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Deus Pater omnípotens sit nobis propítius et clemens.

R. Amen.

Ex lítteris Encyclicis Pii Papæ undécimi

At enim beáte regnántem Christum in cælis qui piaculáres ritus consolári queant? Scílicet « da amántem et sentit quod dico » repónimus, Augustíni verbis usi, quæ in hunc locum aptíssime cadunt. Dei enim amantíssimus quisque, si prætériti témporis spátium respíciat, videt meditándo intuetúrque Christum pro hómine laborántem, doléntem, duríssima quæque perpetiéntem, « propter nos hómines et propter nostram salútem » tristítia, angóribus, oppróbriis pæne conféctum, immo « attrítum propter scélera nostra » ac suo nos livóre sanántem. Atque hæc ómnia eo vérius piórum meditántur ánimi, quod peccáta hóminum ac flagítia quovis témpore perpetráta in causa fuérunt cur Dei Fílius morti traderétur, eadémque nunc étiam mortem ipsam per se essent Christo illatúra, iísdem cum dolóribus mæroribúsque conjúnctam, quippe síngula passiónem Dómini, suo quodam modo renováre censeántur: « Rursus crucifigéntes sibimetípsis Fílium Dei et osténtui habéntes ».

V. Tu autem, Dómine, miserére nobis.

R. Deo grátias.

R. Prope est Dóminus ómnibus invocántibus eum,

* Omnibus invocántibus eum in veritáte.

V. Miserátor et miséricors Dóminus, pátiens et multum miséricors.

R. Omnibus invocántibus eum in veritáte.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Christus perpétuæ det nobis gáudia vitæ.

R. Amen.

Quodsi propter peccáta quoque nostra, quæ futúra quidem erant at prævísa, ánima Christi tristis facta est usque ad mortem, haud dúbium quin solátii nonníhil jam tum céperit étiam e nostra item prævísa, reparatióne, cum « appáruit illi Angelus de cælo » ut Cor ejus tædio et angóribus oppréssum consolarétur. Atque ita Cor illud sacratíssimum, quod ingratórum hóminum peccátis continénter sauciátur, étiam nunc mira quidem sed vera ratióne solári póssumus ac debémus, quandóquidem, ut in sacra quoque liturgía légitur, ex ore Psaltis, Christus ipse se ab amícis suis derelíctum conquéritur: « Impropérium exspectávit Cor meum et misériam, et sustínui qui simul contristarétur et non fuit, et qui consolarétur et non invéni ».

V. Tu autem, Dómine, miserére nobis.

R. Deo grátias.

R. Confíteor tibi, Pater, Dómine cæli et terræ, quia abscondísti hæc a sapiéntibus et prudéntibus

* Et revelásti ea párvulis.

V. Ita, Pater, quóniam sic fuit plácitum ante te.

R. Et revelásti ea párvulis.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Ignem sui amóris accéndat Deus in córdibus nostris.

R. Amen.

Accedit quod pássio Christi expiátrix renovátur et quodámmodo continuátur et adimplétur in córpore suo mystico, quod est Ecclésia. Etenim, ut rursus sancti Augustíni verbis utámur, « passus est Christus quidquid pati debúerat; jam de mensúra passiónum nihil deest. Ergo implétæ sunt passiónes, sed in cápite; restábant adhuc Christi passiónes in córpore ». Quod quidem Dóminus ipse Jesus declaráre dignátus est, cum ad Saulum « adhuc spirántem minárum et cædis in discípulos » loquens: « Ego sum, inquit, Jesus quem tu persequéris », haud obscúre signíficans, commótis in Ecclésiam insectatiónibus, ipsum divínum oppugnári ac vexári Ecclésiæ Caput. Jure ígitur meritóque Christus in córpore suo mystico adhuc pátiens, nos expiatiónis suæ sócios habére exóptat, idque étiam ipsa nostra cum eo necessitúdo póstulat; nam cum simus « corpus Christi et membra de membro », quidquid pátitur caput, ómnia cum eo membra patiántur opórtet.

V. Tu autem, Dómine, miserére nobis.

R. Deo grátias.

R. Omnes gentes quascúmque fecísti, vénient

* Et adorábunt coram te, Dómine.

V. Et glorificábunt nomen tuum, quóniam magnus es tu, et fáciens mirabília.

R. Et adorábunt coram te, Dómine.

V. Glória Patri, et Fílio, * et Spirítui Sancto.

R. Et adorábunt coram te, Dómine.

Nocturnus III

Ant. Qui dilígitis Dóminum.

Psalmus 96 [7]

  1. 96:1 Dóminus regnávit, exsúltet terra: * læténtur ínsulæ multæ.
  2. 96:2 Nubes, et calígo in circúitu ejus: * justítia, et judícium corréctio sedis ejus.
  3. 96:3 Ignis ante ipsum præcédet, * et inflammábit in circúitu inimícos ejus.
  4. 96:4 Illuxérunt fúlgura ejus orbi terræ: * vidit, et commóta est terra.
  5. 96:5 Montes, sicut cera fluxérunt a fácie Dómini: * a fácie Dómini omnis terra.
  6. 96:6 Annuntiavérunt cæli justítiam ejus: * et vidérunt omnes pópuli glóriam ejus.
  7. 96:7 Confundántur omnes, qui adórant sculptília: * et qui gloriántur in simulácris suis.
  8. Adoráte eum, omnes Ángeli ejus: * audívit, et lætáta est Sion.
  9. 96:8 Et exsultavérunt fíliæ Judæ, * propter judícia tua, Dómine:
  10. 96:9 Quóniam tu Dóminus Altíssimus super omnem terram: * nimis exaltátus es super omnes deos.
  11. 96:10 Qui dilígitis Dóminum, odíte malum: * custódit Dóminus ánimas sanctórum suórum, de manu peccatóris liberábit eos.
  12. 96:11 Lux orta est justo, * et rectis corde lætítia.
  13. 96:12 Lætámini, justi, in Dómino: * et confitémini memóriæ sanctificatiónis ejus.
Ant. Vidérunt.

Psalmus 97 [8]

  1. 97:1 Cantáte Dómino cánticum novum: * quia mirabília fecit.
  2. Salvávit sibi déxtera ejus: * et brácchium sanctum ejus.
  3. 97:2 Notum fecit Dóminus salutáre suum: * in conspéctu géntium revelávit justítiam suam.
  4. 97:3 Recordátus est misericórdiæ suæ, * et veritátis suæ dómui Israël.
  5. Vidérunt omnes términi terræ * salutáre Dei nostri.
  6. 97:4 Jubiláte Deo, omnis terra: * cantáte, et exsultáte, et psállite.
  7. 97:5 Psállite Dómino in cíthara, in cíthara et voce psalmi: * in tubis ductílibus, et voce tubæ córneæ.
  8. 97:6 Jubiláte in conspéctu regis Dómini: * moveátur mare, et plenitúdo ejus: orbis terrárum, et qui hábitant in eo.
  9. 97:8 Flúmina plaudent manu, simul montes exsultábunt a conspéctu Dómini: * quóniam venit judicáre terram.
  10. 97:9 Judicábit orbem terrárum in justítia, * et pópulos in æquitáte.
Ant. Psallam tibi.

Psalmus 107 [9]

  1. 107:2 Parátum cor meum, Deus, parátum cor meum: * cantábo, et psallam in glória mea.
  2. 107:3 Exsúrge, glória mea, exsúrge, psaltérium et cíthara: * exsúrgam dilúculo.
  3. 107:4 Confitébor tibi in pópulis, Dómine: * et psallam tibi in natiónibus.
  4. 107:5 Quia magna est super cælos misericórdia tua: * et usque ad nubes véritas tua:
  5. 107:6 Exaltáre super cælos, Deus, et super omnem terram glória tua: * ut liberéntur dilécti tui.
  6. 107:7 Salvum fac déxtera tua, et exáudi me: * Deus locútus est in sancto suo:
  7. 107:8 Exsultábo, et dívidam Síchimam, * et convállem tabernaculórum dimétiar.
  8. 107:9 Meus est Gálaad, et meus est Manásses: * et Éphraim suscéptio cápitis mei.
  9. 107:10 Juda rex meus: * Moab lebes spei meæ.
  10. In Idumǽam exténdam calceaméntum meum: * mihi alienígenæ amíci facti sunt.
  11. 107:11 Quis dedúcet me in civitátem munítam? * quis dedúcet me usque in Idumǽam?
  12. 107:12 Nonne tu, Deus, qui repulísti nos, * et non exíbis, Deus, in virtútibus nostris?
  13. 107:13 Da nobis auxílium de tribulatióne: * quia vana salus hóminis.
  14. 107:14 In Deo faciémus virtútem: * et ipse ad níhilum dedúcet inimícos nostros.
V.
Memóriam fecit mirabílium suórum miserátor Dóminus.
R.
Escam dedit timéntibus se.
Pater Noster dicitur secreto usque ad Et ne nos indúcas in tentatiónem:

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris:

V. Et ne nos indúcas in tentatiónem:

R. Sed líbera nos a malo.

Absolutio.

A vínculis peccatórum nostrórum absólvat nos omnípotens et miséricors Dóminus.

R. Amen.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Evangélica léctio sit nobis salus et protéctio.

R. Amen.

Léctio sancti Evangélii secúndum Joánnem

Joannes 19:31-37

In illo témpore: Judæi, quóniam parascéve erat, ut non remanérent in cruce córpora sábbato (erat enim magnus dies ille sábbati) rogavérunt Pilátum, ut frangeréntur eórum crura et tolleréntur. Et réliqua.

Homilia sancti Petri Canísii Presbýteri

Diligénter tecum ánimo versa, quam ineffábilis fúerit illa cáritas qua Deus summus, in máximis Cordis angústiis et totíus mundi oppróbriis, pro te vilíssimo vermículo illam crucis acerbíssimam mortem perpéssus fúerat. Advérte ut summam Christus Servátor suis liberalitátem ómnibus exhíbuit. Aliquándo enim in médio pópuli stans, ita clamábat: Si quis sitit véniat ad me et bibat: parátum se osténdens ómnibus ómnium necessitátibus subveníre. Consideráto ut liberalíssime tibi Cordis sui pretiósum sánguinem propinávit, quando, sacro látere apérto, quidquid réliquum erat in córpore sánguinis profúdit.

V. Tu autem, Dómine, miserére nobis.

R. Deo grátias.

R. Ego si exaltátus fúero a terra

* Omnia traham ad meípsum.

V. Hoc autem dicébat signíficans qua morte esset moritúrus.

R. Omnia traham ad meípsum.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Divínum auxílium máneat semper nobíscum.

R. Amen.

In Evang. Dominica I post Pascha

Quare, ne prorsus ingrátus sim, hos perénnes fontes donórum ac bonórum ómnium mihi ob óculos sæpe propónam, cum de illis dulcíssima exstet promíssio: Hauriétis aquas in gáudio de fóntibus Salvatóris et dicétis in die illa: Confitémini Dómino. Ad hæc ipsa ter beáta petræ non diruéndæ forámina confúgiam; in illis meum nidum firmíssimum ponam, nihil habens antíquius, prætérquam ut in meis angóribus atque perículis vúlnerum Dómini memorándo respírem.

V. Tu autem, Dómine, miserére nobis.

R. Deo grátias.

R. Simus ergo imitatóres Dei

* Et ambulémus in dilectióne.

V. Sicut et Christus diléxit nos et trádidit semetípsum pro nobis.

R. Et ambulémus in dilectióne.

V. Glória Patri, et Fílio, * et Spirítui Sancto.

R. Et ambulémus in dilectióne.

Extra Chorum, quando ab uno tantum recitatur Officium dicitur: Jube, Dómine, benedícere; et subjungitur congruens Benedictio.
V.
Jube, domne, benedícere.

Benedictio.

Ad societátem cívium supernórum perdúcat nos Rex Angelórum.

R. Amen.

Medit. 6

Et tu in omni tentatióne fuge diligénter in amábile Christi Cor, ejúsque bonitátem et caritátem tibi propóne, et cum illa confer tuam vilitátem, malítiam, infidelitátem, arrogántiam. Quanta enim cáritas Christi omnes ad se convocántis: Veníte ad me omnes qui laborátis et oneráti estis, et ego refíciam vos, et sic parátum se offert et cupit, amóre nostri, ómnium et singulórum ónera sustinére! Unde magna cum fidúcia in caritátis ejus abyssum prójice peccáta tua et mox te invénies exonerátum.

V. Tu autem, Dómine, miserére nobis.

R. Deo grátias.

Te Deum

Te Deum laudámus: * te Dóminum confitémur.

Te ætérnum Patrem * omnis terra venerátur.

Tibi omnes Ángeli, * tibi Cæli, et univérsæ Potestátes:

Tibi Chérubim et Séraphim * incessábili voce proclámant:

Fit reverentia Sanctus, Sanctus, Sanctus * Dóminus Deus Sábaoth.

Pleni sunt cæli et terra * majestátis glóriæ tuæ.

Te gloriósus * Apostolórum chorus,

Te Prophetárum * laudábilis númerus,

Te Mártyrum candidátus * laudat exércitus.

Te per orbem terrárum * sancta confitétur Ecclésia,

Patrem * imménsæ majestátis;

Venerándum tuum verum * et únicum Fílium;

Sanctum quoque * Paráclitum Spíritum.

Tu Rex glóriæ, * Christe.

Tu Patris * sempitérnus es Fílius.

Fit reverentia Tu, ad liberándum susceptúrus hóminem: * non horruísti Vírginis úterum.

Tu, devícto mortis acúleo, * aperuísti credéntibus regna cælórum.

Tu ad déxteram Dei sedes, * in glória Patris.

Judex créderis * esse ventúrus.

Sequens versus dicitur flexis genibus Te ergo quǽsumus, tuis fámulis súbveni, * quos pretióso sánguine redemísti.

Ætérna fac cum Sanctis tuis * in glória numerári.

Salvum fac pópulum tuum, Dómine, * et bénedic hereditáti tuæ.

Et rege eos, * et extólle illos usque in ætérnum.

Per síngulos dies * benedícimus te.

Fit reverentia, secundum consuetudinem Et laudámus nomen tuum in sǽculum, * et in sǽculum sǽculi.

Dignáre, Dómine, die isto * sine peccáto nos custodíre.

Miserére nostri, Dómine, * miserére nostri.

Fiat misericórdia tua, Dómine, super nos, * quemádmodum sperávimus in te.

In te, Dómine, sperávi: * non confúndar in ætérnum.

Reliqua omittuntur, nisi Laudes separandæ sint.

V.
Dómine, exáudi oratiónem meam.
R.
Et clamor meus ad te véniat.

Orémus.

Deus, qui nobis in Corde Fílii tui, nostris vulneráto peccátis, infinítos dilectiónis thesáuros misericórditer largíri dignáris; concéde, quǽsumus, ut illi devótum pietátis nostræ præstántes obséquium, dignæ quoque satisfactiónis exhibeámus offícium.

Per eúmdem Dóminum nostrum Jesum Christum Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

V.
Dómine, exáudi oratiónem meam.
R.
Et clamor meus ad te véniat.
V.
Benedicámus Dómino.
R.
Deo grátias.
V.
Fidélium ánimæ per misericórdiam Dei requiéscant in pace.
R.
Amen.
Pater Noster dicitur totum secreto.

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Post Divinum officium