B
Diei VII infra Octavam Nativitatis II. classis
Feria V, 31 Decembris MMXXVI
Hodie Ad Missam →
1962 Pre-1955

Diei VII infra Octavam Nativitatis

II. classis
Ad Prima

Ad Primam

V.
Deus ✠ in adiutórium meum inténde.
R.
Dómine, ad adiuvándum me festína.

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Allelúia.

Hymnus

Iam lucis orto sídere,

Deum precémur súpplices,

Ut in diúrnis áctibus

Nos servet a nocéntibus.

Linguam refrénans témperet,

Ne litis horror ínsonet:

Visum fovéndo cóntegat,

Ne vanitátes háuriat.

Sint pura cordis íntima,

Absístat et vecórdia;

Carnis terat supérbiam

Potus cibíque párcitas.

Ut, cum dies abscésserit,

Noctémque sors redúxerit,

Mundi per abstinéntiam

Ipsi canámus glóriam.

Deo Patri sit glória,

Eiúsque soli Fílio,

Cum Spíritu Paráclito,

Nunc et per omne sǽculum.

Amen.

Ant. In loco páscuæ * ibi Dóminus me collocávit.

Psalmus 22 [1]

  1. 22:1 Dóminus regit me, et nihil mihi déerit: * in loco páscuæ ibi me collocávit.
  2. 22:2 Super aquam refectiónis educávit me: * ánimam meam convértit.
  3. 22:3 Dedúxit me super sémitas iustítiæ, * propter nomen suum.
  4. 22:4 Nam, et si ambulávero in médio umbræ mortis, non timébo mala: * quóniam tu mecum es.
  5. Virga tua, et báculus tuus: * ipsa me consoláta sunt.
  6. 22:5 Parásti in conspéctu meo mensam, * advérsus eos, qui tríbulant me.
  7. Impinguásti in óleo caput meum: * et calix meus inébrians quam præclárus est!
  8. 22:6 Et misericórdia tua subsequétur me * ómnibus diébus vitæ meæ:
  9. Et ut inhábitem in domo Dómini, * in longitúdinem diérum.

Psalmus 71(2-8) [2]

  1. 71:2 Deus, iudícium tuum regi da: * et iustítiam tuam fílio regis:
  2. Iudicáre pópulum tuum in iustítia, * et páuperes tuos in iudício.
  3. 71:3 Suscípiant montes pacem pópulo: * et colles iustítiam.
  4. 71:4 Iudicábit páuperes pópuli, et salvos fáciet fílios páuperum: * et humiliábit calumniatórem.
  5. 71:5 Et permanébit cum sole, et ante lunam, * in generatióne et generatiónem.
  6. 71:6 Descéndet sicut plúvia in vellus: * et sicut stillicídia stillántia super terram.
  7. 71:7 Oriétur in diébus eius iustítia, et abundántia pacis: * donec auferátur luna.
  8. 71:8 Et dominábitur a mari usque ad mare: * et a flúmine usque ad términos orbis terrárum.

Psalmus 71(9-19) [3]

  1. 71:9 Coram illo prócident Æthíopes: * et inimíci eius terram lingent.
  2. 71:10 Reges Tharsis, et ínsulæ múnera ófferent: * reges Árabum et Saba dona addúcent.
  3. 71:11 Et adorábunt eum omnes reges terræ: * omnes gentes sérvient ei:
  4. 71:12 Quia liberábit páuperem a poténte: * et páuperem, cui non erat adiútor.
  5. 71:13 Parcet páuperi et ínopi: * et ánimas páuperum salvas fáciet.
  6. 71:14 Ex usúris et iniquitáte rédimet ánimas eórum: * et honorábile nomen eórum coram illo.
  7. 71:15 Et vivet, et dábitur ei de auro Arábiæ, et adorábunt de ipso semper: * tota die benedícent ei.
  8. 71:16 Et erit firmaméntum in terra in summis móntium, superextollétur super Líbanum fructus eius: * et florébunt de civitáte sicut fænum terræ.
  9. 71:17 Sit nomen eius benedíctum in sǽcula: * ante solem pérmanet nomen eius.
  10. Et benedicéntur in ipso omnes tribus terræ: * omnes gentes magnificábunt eum.
  11. 71:18 Benedíctus Dóminus, Deus Israël, * qui facit mirabília solus:
  12. 71:19 Et benedíctum nomen maiestátis eius in ætérnum: * et replébitur maiestáte eius omnis terra: fiat, fiat.

1 Tim. 1:17

Regi sæculórum immortáli et invisíbili, soli Deo honor et glória in sǽcula sæculórum. Amen.

R. Deo grátias.

R. Christe, Fili Dei vivi, * Miserére nobis.

R. Christe, Fili Dei vivi, * Miserére nobis.

V. Qui natus es de María Vírgine.

R. Miserére nobis.

V. Glória Patri, et Fílio, * et Spirítui Sancto.

R. Christe, Fili Dei vivi, * Miserére nobis.

V. Exsúrge, Christe, ádiuva nos.

R. Et líbera nos propter nomen tuum.

V.
Dómine, exáudi oratiónem meam.
R.
Et clamor meus ad te véniat.

Orémus.

Dómine Deus omnípotens, qui ad princípium huius diéi nos perveníre fecísti: tua nos hódie salva virtúte; ut in hac die ad nullum declinémus peccátum, sed semper ad tuam iustítiam faciéndam nostra procédant elóquia, dirigántur cogitatiónes et ópera.

Per Dóminum nostrum Iesum Christum, Fílium tuum: qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

V. Dómine, exáudi oratiónem meam.

R. Et clamor meus ad te véniat.

V. Benedicámus Dómino.

R. Deo grátias.

Kaléndis Ianuárii Luna vicésima tértia Anno Dómini 2027

Octáva Nativitátis Dómini nostri Iesu Christi.

Circumcísio eiúsdem Dómini nostri Iesu Christi.

Romæ pássio sanctæ Martínæ, Vírginis et Mártyris; quæ, sub Alexándro Imperatóre, divérsis tormentórum genéribus cruciáta, tandem, gládio percússa, martýrii palmam adépta est. Ipsíus vero festum tértio Kaléndas Februárii recólitur.

Cæsaréæ, in Cappadócia, deposítio sancti Basilíi, cognoménto Magni, Epíscopi, Confessóris et Ecclésiæ Doctóris; qui, témpore Valéntis Imperatóris, doctrína et sapiéntia insignítus omnibúsque virtútibus exornátus, mirabíliter effúlsit, et Ecclésiam advérsus Ariános et Macedoniános inexpugnábili constántia deféndit. Eius autem festívitas potíssimum ágitur décimo octávo Kaléndas Iúlii, quo die Epíscopus ordinátus est.

Apud montem Senárium, in Etrúria, natális sancti Bonfílii Confessóris, e septem Fundatóribus Ordinis Servórum beátæ Maríæ Vírginis, quam cum idem impénse coluísset, ab ipsa in cælum repénte evocátus est. Illíus porro ac Sociórum festum prídie Idus Februárii celebrátur.

Romæ sancti Almáchii Mártyris, qui, cum díceret: «Hodie Octavæ Domínici diéi sunt, cessáte a superstitiónibus idolórum et a sacrifíciis pollútis,» proptérea, iubénte Præfécto Urbis Alípio, a gladiatóribus occísus est.

Item Romæ, via Appia, corónæ sanctórum mílitum trigínta Mártyrum, sub Diocletiáno Imperatóre.

Apud Spolétum sancti Concórdii, Presbýteri et Mártyris; qui, tempóribus Antoníni Imperatóris, primo cæsus fústibus, dehinc equúleo suspénsus, ac póstea macerátus in cárcere, ibíque Angélica visitatióne confortátus, demum gládio vitam finívit.

Eódem die sancti Magni Mártyris.

In Africa beáti Fulgéntii, Ruspénsis Ecclésiæ Epíscopi, qui, témpore Wandálicæ persecutiónis, ob cathólicam fidem eximiámque doctrínam, ab Ariánis multa perpéssus et in Sardíniam relegátus est; atque tandem, ad própriam Ecclésiam redíre permíssus, vita et verbo clarus, sancto fine quiévit.

Teáte, in Aprútio citerióre, natális sancti Iustíni, eiúsdem civitátis Epíscopi, sanctitáte vitæ ac miráculis clari.

In território Lugdunénsi, monastério Iurénsium, sancti Eugéndi Abbátis, cuius vita virtútibus et miráculis plena refúlsit.

Apud Silviníacum, in Gállia, sancti Odilónis, Abbátis Cluniacénsis, qui primus Commemoratiónem ómnium Fidélium Defunctórum, prima die post festum ómnium Sanctórum, in suis monastériis fíeri præcépit; quem ritum póstea universális Ecclésia recípiens comprobávit.

Romæ natális sancti Vincéntii Maríæ Strambi, Epíscopi Maceraténsis et Tolentíni, Congregatiónis a Cruce et Passióne Iesu sodális, pastoráli zelo præclári, quem Pius Papa Duodécimus inter Sanctos rétulit.

Alexandríæ deposítio sanctæ Euphrósynæ Vírginis, quæ in monastério virtúte abstinéntiæ ac miráculis cláruit.

V. Et álibi aliórum plurimórum sanctórum Mártyrum et Confessórum, atque sanctárum Vírginum.

R. Deo grátias.

V.
Pretiósa in conspéctu Dómini.
R.
Mors Sanctórum eius.

Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum.

R. Amen.

V.
Deus in adiutórium meum inténde.
R.
Dómine, ad adiuvándum me festína.
V.
Deus in adiutórium meum inténde.
R.
Dómine, ad adiuvándum me festína.
V.
Deus in adiutórium meum inténde.
R.
Dómine, ad adiuvándum me festína.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in sǽcula sæculórum. Amen.

Kýrie, eléison. Christe, eléison. Kýrie, eléison.

Pater Noster dicitur secreto usque ad Et ne nos indúcas in tentatiónem:

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum cotidiánum da nobis hódie: et dimítte nobis débita nostra, sicut et nos dimíttimus debitóribus nostris:

V. Et ne nos indúcas in tentatiónem:

R. Sed líbera nos a malo.

V. Réspice in servos tuos, Dómine, et in ópera tua, et dírige fílios eórum.

R. Et sit splendor Dómini Dei nostri super nos, et ópera mánuum nostrárum dírige super nos, et opus mánuum nostrárum dírige.

V. Glória Patri, et Fílio, * et Spirítui Sancto.

R. Sicut erat in princípio, et nunc, et semper, * et in sǽcula sæculórum. Amen.

Orémus.

Dirígere et sanctificáre, régere et gubernáre dignáre, Dómine Deus, Rex cæli et terræ, hódie corda et córpora nostra, sensus, sermónes et actus nostros in lege tua, et in opéribus mandatórum tuórum: ut hic et in ætérnum, te auxiliánte, salvi et líberi esse mereámur, Salvátor mundi: Qui vivis et regnas in sǽcula sæculórum.

R. Amen.

V.
Iube, Dómine, benedícere.

Benedictio. Heb 1:11-12

Dies et actus nostros in sua pace dispónat Dóminus omnípotens.

R. Amen.

Ipsi períbunt, tu autem permanébis; et omnes sicut vestiméntum veteráscent: et velut amíctum mutábis eos, et mutabúntur: tu autem idem ipse es, et anni tui non defícient.

V. Tu autem, Dómine, miserére nobis.

R. Deo grátias.

V.
Adiutórium nostrum ✠ in nómine Dómini.
R.
Qui fecit cælum et terram.
V.
Benedícite.
R.
Deus.

Benedictio.

Dóminus nos benedícat, ✠ et ab omni malo deféndat, et ad vitam perdúcat ætérnam. Et fidélium ánimæ per misericórdiam Dei requiéscant in pace.

R. Amen.