B
Ss. Nazarii et Celsi Martyrum, Victoris I Papæ et Martyris ac Innocentii I Papæ et Confessoris III. classis
Feria III, 28 Iulii MMXXVI
Hodie Ad Missam →
1962 Pre-1955

Ss. Nazarii et Celsi Martyrum, Victoris I Papæ et Martyris ac Innocentii I Papæ et Confessoris

III. classis
Ad Prima

Ad Primam

V.
Deus ✠ in adiutórium meum inténde.
R.
Dómine, ad adiuvándum me festína.

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Allelúia.

Hymnus

Iam lucis orto sídere,

Deum precémur súpplices,

Ut in diúrnis áctibus

Nos servet a nocéntibus.

Linguam refrénans témperet,

Ne litis horror ínsonet:

Visum fovéndo cóntegat,

Ne vanitátes háuriat.

Sint pura cordis íntima,

Absístat et vecórdia;

Carnis terat supérbiam

Potus cibíque párcitas.

Ut, cum dies abscésserit,

Noctémque sors redúxerit,

Mundi per abstinéntiam

Ipsi canámus glóriam.

Deo Patri sit glória,

Eiúsque soli Fílio,

Cum Spíritu Paráclito,

Nunc et per omne sǽculum.

Amen.

Ant. Deus meus * in te confído non erubéscam.

Psalmus 24(1-7) [1]

  1. 24:1 Ad te, Dómine, levávi ánimam meam: * Deus meus, in te confído, non erubéscam.
  2. 24:3 Neque irrídeant me inimíci mei: * étenim univérsi, qui sústinent te, non confundéntur.
  3. 24:4 Confundántur omnes iníqua agéntes * supervácue.
  4. Vias tuas, Dómine, demónstra mihi: * et sémitas tuas édoce me.
  5. 24:5 Dírige me in veritáte tua, et doce me: * quia tu es, Deus, salvátor meus, et te sustínui tota die.
  6. 24:6 Reminíscere miseratiónum tuárum, Dómine, * et misericordiárum tuárum, quæ a sǽculo sunt.
  7. 24:7 Delícta iuventútis meæ, * et ignorántias meas ne memíneris.
  8. Secúndum misericórdiam tuam meménto mei tu: * propter bonitátem tuam, Dómine.

Psalmus 24(8-14) [2]

  1. 24:8 Dulcis et rectus Dóminus: * propter hoc legem dabit delinquéntibus in via.
  2. 24:9 Díriget mansuétos in iudício: * docébit mites vias suas.
  3. 24:10 Univérsæ viæ Dómini, misericórdia et véritas, * requiréntibus testaméntum eius et testimónia eius.
  4. 24:11 Propter nomen tuum, Dómine, propitiáberis peccáto meo: * multum est enim.
  5. 24:12 Quis est homo qui timet Dóminum? * legem státuit ei in via, quam elégit.
  6. 24:13 Ánima eius in bonis demorábitur: * et semen eius hereditábit terram.
  7. 24:14 Firmaméntum est Dóminus timéntibus eum: * et testaméntum ipsíus ut manifestétur illis.

Psalmus 24(15-22) [3]

  1. 24:15 Óculi mei semper ad Dóminum: * quóniam ipse evéllet de láqueo pedes meos.
  2. 24:16 Réspice in me, et miserére mei: * quia únicus et pauper sum ego.
  3. 24:17 Tribulatiónes cordis mei multiplicátæ sunt: * de necessitátibus meis érue me.
  4. 24:18 Vide humilitátem meam, et labórem meum: * et dimítte univérsa delícta mea.
  5. 24:19 Réspice inimícos meos quóniam multiplicáti sunt, * et ódio iníquo odérunt me.
  6. 24:20 Custódi ánimam meam, et érue me: * non erubéscam quóniam sperávi in te.
  7. 24:21 Innocéntes et recti adhæsérunt mihi: * quia sustínui te.
  8. 24:22 Líbera, Deus, Israël, * ex ómnibus tribulatiónibus suis.

1 Tim. 1:17

Regi sæculórum immortáli et invisíbili, soli Deo honor et glória in sǽcula sæculórum. Amen.

R. Deo grátias.

R. Christe, Fili Dei vivi, * Miserére nobis.

R. Christe, Fili Dei vivi, * Miserére nobis.

V. Qui sedes ad déxteram Patris.

R. Miserére nobis.

V. Glória Patri, et Fílio, * et Spirítui Sancto.

R. Christe, Fili Dei vivi, * Miserére nobis.

V. Exsúrge, Christe, ádiuva nos.

R. Et líbera nos propter nomen tuum.

V.
Dómine, exáudi oratiónem meam.
R.
Et clamor meus ad te véniat.

Orémus.

Dómine Deus omnípotens, qui ad princípium huius diéi nos perveníre fecísti: tua nos hódie salva virtúte; ut in hac die ad nullum declinémus peccátum, sed semper ad tuam iustítiam faciéndam nostra procédant elóquia, dirigántur cogitatiónes et ópera.

Per Dóminum nostrum Iesum Christum, Fílium tuum: qui tecum vivit et regnat in unitáte Spíritus Sancti, Deus, per ómnia sǽcula sæculórum.

R. Amen.

V. Dómine, exáudi oratiónem meam.

R. Et clamor meus ad te véniat.

V. Benedicámus Dómino.

R. Deo grátias.

Quarto Kaléndas Augústi Luna quarta décima Anno Dómini 2026

Tarásci, in Gállia Narbonénsi, sanctæ Marthæ Vírginis, hóspitæ Salvatóris nostri ac soróris beatórum Maríæ Magdalénæ et Lázari.

Romæ, via Portuénsi, sanctórum Mártyrum Felícis, Simplícii, Faustíni et Beatrícis, tempóribus Diocletiáni Imperatóris. Horum duo primi, post multa et divérsa supplícia, iussi sunt capitálem subíre senténtiam; Beátrix vero, eórum soror, in confessióne Christi est in cárcere præfocáta.

Romæ prætérea sanctórum Mártyrum Lucíllæ et Floræ Vírginum, Eugénii, Antoníni, Theodóri, et Sociórum decem et octo; qui sub Galliéno Imperatóre martýrium obiérunt.

Item Romæ sanctæ Serápiæ Vírginis, quæ, sub Hadriáno Príncipe, cum esset trádita duóbus lascívis iuvénibus et mínime potuísset illúdi, nec póstmodum ardéntibus fácibus inflammári, Derílli Iúdicis iussu fústibus cæsa est, dehinc gládio decolláta. Eius corpus a beáta Sabína in suo monuménto, iuxta áream Vindiciáni, sepúltum est; sed memória ipsíus martýrii tértio Nonas Septémbris celébrior habétur, quo die ambárum sarcóphagum ibi compósitum et ornátum fuit, et locus oratiónis condígne dicátus.

Gangris, in Paphlagónia, sancti Calliníci Mártyris, qui, virgis férreis verberátus aliísque supplíciis afflíctus, tandem, in fornácem iniéctus, spíritum Deo réddidit.

In Norvégia sancti Olávi, Regis et Mártyris.

Trecis, in Gállia, sancti Lupi, Epíscopi et Confessóris; qui, cum beáto Germáno, ad expugnándam Pelagianórum hǽresim, in Británniam perréxit, urbémque Trecas a furóre Attilæ, Gálliam omnem devastántis, assídua oratióne deféndit; demum, quinquagínta duóbus annis sacerdótio venerabíliter functus, in pace quiévit.

In civitáte Briocénsi, in Gállia, sancti Guliélmi, Epíscopi et Confessóris.

Item deposítio beáti Prósperi, Aurelianénsis Epíscopi.

Apud Tudértum, in Umbria, sancti Faustíni Confessóris.

In civitáte Mamiénsi sanctæ Seraphínæ.

Romæ beáti Urbáni Papæ Secúndi, qui, sancti Gregórii Séptimi vestígia secútus, doctrínæ et religiónis stúdio enítuit, et fidéles Cruce signátos ad sacra Palæstínæ loca ex infidélium domínio rediménda excitávit. Cultum autem, ab immemorábili témpore eídem exhíbitum, Leo Décimus tértius, Póntifex Máximus, ratum hábuit et confirmávit.

V. Et álibi aliórum plurimórum sanctórum Mártyrum et Confessórum, atque sanctárum Vírginum.

R. Deo grátias.

V.
Pretiósa in conspéctu Dómini.
R.
Mors Sanctórum eius.

Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum.

R. Amen.

V.
Deus in adiutórium meum inténde.
R.
Dómine, ad adiuvándum me festína.
V.
Deus in adiutórium meum inténde.
R.
Dómine, ad adiuvándum me festína.
V.
Deus in adiutórium meum inténde.
R.
Dómine, ad adiuvándum me festína.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in sǽcula sæculórum. Amen.

Kýrie, eléison. Christe, eléison. Kýrie, eléison.

Pater Noster dicitur secreto usque ad Et ne nos indúcas in tentatiónem:

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum cotidiánum da nobis hódie: et dimítte nobis débita nostra, sicut et nos dimíttimus debitóribus nostris:

V. Et ne nos indúcas in tentatiónem:

R. Sed líbera nos a malo.

V. Réspice in servos tuos, Dómine, et in ópera tua, et dírige fílios eórum.

R. Et sit splendor Dómini Dei nostri super nos, et ópera mánuum nostrárum dírige super nos, et opus mánuum nostrárum dírige.

V. Glória Patri, et Fílio, * et Spirítui Sancto.

R. Sicut erat in princípio, et nunc, et semper, * et in sǽcula sæculórum. Amen.

Orémus.

Dirígere et sanctificáre, régere et gubernáre dignáre, Dómine Deus, Rex cæli et terræ, hódie corda et córpora nostra, sensus, sermónes et actus nostros in lege tua, et in opéribus mandatórum tuórum: ut hic et in ætérnum, te auxiliánte, salvi et líberi esse mereámur, Salvátor mundi: Qui vivis et regnas in sǽcula sæculórum.

R. Amen.

V.
Iube, Dómine, benedícere.

Benedictio.

Dies et actus nostros in sua pace dispónat Dóminus omnípotens.

R. Amen.

2 Thess 3:5

Dóminus autem dírigat corda et córpora nostra in caritáte Dei et patiéntia Christi.

V. Tu autem, Dómine, miserére nobis.

R. Deo grátias.

V.
Adiutórium nostrum ✠ in nómine Dómini.
R.
Qui fecit cælum et terram.
V.
Benedícite.
R.
Deus.

Benedictio.

Dóminus nos benedícat, ✠ et ab omni malo deféndat, et ad vitam perdúcat ætérnam. Et fidélium ánimæ per misericórdiam Dei requiéscant in pace.

R. Amen.