Alma Redemptóris Mater

Loving Mother of the Redeemer

Final Marian antiphon after Compline from Advent through the Feast of the Purification.

Ascribed to Hermann the Lame, 11th c.

Alma Redemptóris Mater, quæ pérvia cæli

porta manes, et stella maris, succúrre cadénti,

súrgere qui curat, pópulo: tu quæ genuísti,

natúra miránte, tuum sanctum Genitórem,

Virgo prius ac postérius, Gabriélis ab ore

sumens illud Ave, peccatórum miserére.

In Adventu:

V.: Ángelus Dómini nuntiávit Maríæ.
R.: Et concépit de Spíritu Sancto.

Orémus. Grátiam tuam, quǽsumus, Dómine, méntibus nostris infúnde: ut, qui, Ángelo nuntiánte, Christi Fílii tui incarnatiónem cognóvimus; per passiónem ejus et crucem, ad resurrectiónis glóriam perducámur. Per eúmdem Christum Dóminum nostrum. Amen.

A Nativitate ad Purificationem:

V.: Post partum, Virgo, invioláta permansísti.
R.: Dei Génetrix, intercéde pro nobis.

Orémus. Deus, qui salútis ætérnæ, beátæ Maríæ virginitáte fecúnda, humáno géneri prǽmia præstitísti: tríbue, quǽsumus; ut ipsam pro nobis intercédere sentiámus, per quam merúimus auctórem vitæ suscípere, Dóminum nostrum Jesum Christum Fílium tuum. Amen.